पोखरा ।
स्वर्गीय गोपालचन्द्र गोतामे स्वर्णपदक पत्रकारिता पुरस्कार पोखराका अग्रज पत्रकार बद्रिविनोद प्रतीकलाई प्रदान गरिएको छ । वीरगन्जमा बुधबार पत्रकार गोपालचन्द्र गौतम प्रतिष्ठान वीरगन्जले आयोजना गरेको कार्यक्रममा प्रतिकलाई एक तोला सुन सहितको उक्त पुरस्कार प्रदान गरिएको हो ।

वीरगन्जका पत्रकार स्वर्गीय गौतमको स्मृतिमा १३ वर्ष पहिले स्थापित स्वर्गीय गोपालचन्द्र गौतम प्रतिष्ठानले सामाजिक उत्तरदायित्व अनुरूप अब्बल पत्रकारिता गर्ने एक जना पत्रकारलाई प्रत्येक वर्ष छनौट गरी एक तोला सुनको तक्मा पुरस्कार रूपमा प्रदान गर्दै आएको छ ।

यसअघि यो पुरस्कारबाट देशका विभिन्न जिल्लाका ११ जना पत्रकार पुरस्कृत भइसकेका छन् । गतवर्ष नेपाल पत्रकार महासंघ धनुषा शाखाको अध्यक्ष मनिका झालाई यो पुरस्कार प्रदान गरिएको थियो ।

प्रेस स्वतन्त्रता सेनानि प्रतीक पत्रकार महासंघ कास्कीका पूर्व अध्यक्ष हुन् । प्रतीकले नेपाल सरकारबाट बरिष्ठ पत्रकार सम्मान, पोखरा पत्रकारिता सम्मान, गोविन्द वियोगी पत्रकारिता पुरस्कार लगायत प्राप्त गरिसकेका छन् । उनले लामो समय पत्रकारिता विषय अध्यापन पनि गरेका छन् ।