पोखरा ।
मानसिक स्वास्थ्यको क्षेत्रमा काम गर्दै आइरहको संस्था कोशिशले जीबिकोपार्जनको लागि सहयोग गरेको छ । संस्थाले पोखरा ६ शान्तिपाटनमा रहेको अनु परियारको परिवारलाई २० हजार बराबरको कुखुराका चल्ला, दाना र सोको लागि आवश्यक पर्ने सामग्रीहरु सहयोग गरेको हो ।

आइतबार पोखरा महानगरपालिकाका वडा नम्बर ६ का वडा अध्यक्ष विष्णुबहादुर भट्टराई, कोसिसकी फिल्ड एसोसिएट सपना सुवेदी र शर्मिला न्यौपानले संयुक्त रुपमा हस्तान्तरण गरेका हुन् । परियारलाई मानसिक समस्या भएपछि कोसिस संस्थाले उद्धार गरेर ३ महिनाको उपचार पछि हाल उनी सामान्य अवस्थामा छन् ।

वडा अध्यक्ष विष्णु बहादुर भट्टराइले सामाजिक संस्थाहरु धेरै भए पनि कोशिशले गरेको सहयोगको प्रशंसा गरे । उनले उक्त परिवारलाई वडाले पनि थप सहयोग गर्ने प्रतिबद्धता व्यक्त गरे । संस्थाले प्रदान गरेको सहयोगको उपयोग गर्न र जीविकोपार्जन गर्न उनको आग्रह थियो ।

कोसिसकी फिल्ड एसोसिएट सपना सुवेदीले मानसिक समस्या भए पनि उपचार पछि सामान्य अवस्था आउने हुँदा यो उदाहरणको रुपमा रहेको बताइन् । उनले परियारको पारिवारिक अवस्था कमजोर भएकाले सो सहयोग गरेको जानकारी दिइन् ।