पोखरा ।
पोखरा प्रज्ञा–प्रतिष्ठानका कुलपति, साहित्यकार तथा लोक गायक पद्मराज ढकालले आफ्ना बुवा चन्द्रकान्तको स्मृतिमा शैक्षिक, समाजसेवा तथा सांस्कृतिक पुरस्कार स्थापना गरेका छन् ।

शैक्षिक तथा समाजसेवा पुरस्कारका लागि लक्ष्मी आदर्श मावि पोखरा२७ मा ४ लाख रुपैयाँको अक्षयकोष राखिएको छ भने सांस्कृतिक पुरस्कारका निम्ति लेखनाथ साहित्य प्रतिष्ठानले सञ्चालन गर्ने गरी ४ लाखकै अक्षयकोष स्थापना भएको छ । दुवै पुरस्कारको राशि समान २५ हजार छ ।

यसअघि ढकालले आफ्ना ४ एकल सांगीतिक कार्यक्रम सम्पन्न गरी बचत भएको रकममा ढकालकी बहिनी अम्बिकाले प्रदान गरेको ५० हजार थपेर ७ लाखको अक्षयकोष राखेका छन् । यस अक्षयकोषबाट प्राप्त हुने ब्याजबाट अरु तीन वटा शैक्षिक पुरस्कार स्थापना गरी हरेक वर्ष प्रदान गर्ने गरिएको छ ।

लक्ष्मी आदर्श माविबाट एसइईमा प्रथम हुने छात्रलाई १० हजारको चन्द्रकान्त ढकाल शिक्षा पुरस्कार, छात्रालाई १० हजारको फणीन्द्रकुमारी ढकाल शिक्षा पुरस्कार र जनज्योति मावि पोखरा २८ बाट एसइईमा प्रथम हुने विद्यार्थीलाई १० हजारको मुधुमाया ढकाल शिक्षा पुरस्कार प्रदान गर्ने गरिन्छ । चन्द्रकान्त ढकाल शैक्षिक तथा समाजसेवा पुरस्कार यसै वर्षबाट प्रदान गरिनेछ ।

हरेक वर्ष प्रदान गरिने सांस्कृतिक पुरस्कार यसअघि साहित्यकार वेदनाथ अधिकारीलाई २०७९ मा र लोक साहित्यक संरक्षण समिति पोखरा २६ लाई २०८० मा लेखनाथ जयन्तीका अवसरमा प्रदान गरिएको थियो ।