पोखरा ।
सामाजिक संस्था प्रयत्न नेपालले दृष्टिविहीन महिलालाई हस्ताक्षर गर्न सिकाएको छ । औंठा छापमा निर्भर दृष्टिसम्बन्धी अपांगता भएका महिलालाई ३ दिने तालिम दिएर कागजमा हस्ताक्षर गर्न सक्षम बनाएको संस्थाका अध्यक्ष सरिता लामिछानेले जानकारी दिइन् ।

‘औठा छाप बन्द गरौं’ भन्ने नाराका साथ उनीहरुलाई देख्ने नागरिकलाई जस्तै सक्षम बनाउन तालिम दिइएको हो । संस्थाका अध्यक्ष लामिछानेसहित सिर्जना परियार ऋतु वन्तले हस्ताक्षर तालिममा सहजीकरण गरेका थिए ।

तालिममा उच्च शिक्षा अध्ययनरत, विभिन्न सरकारी तथा गैरसरकारी संस्थामा कार्यरत दृष्टिविहीन महिलाको सहभागिता थियो । सहभागी देवकुमारी हरिजन, कविता आचार्य दाहालले तालिमबाट कागजमा हस्तास्क्षर गर्न सक्षम भएको प्रतिक्रिया दिए ।

यसैबीच प्रयत्न नेपालले मंगलबार सरोकारवाला निकायका प्रतिनिधिलाई अपांगता समावेशी विकासबारे अभिमुखीकरण गरेको छ । कार्यक्रममा नेपाल नेत्रहीन संघका केन्द्रीय महासचिव शिशिर खनालले नेपालमा अपांगताको परिभाषा र वर्गीकरण, संस्थाका अध्यक्ष लामिछानेले अपांगता समावेशी विकासबारे सहजीकरण गरेका छन् । अध्यक्ष लामिछानेले अपांगता भएका व्यक्तिका लागि समुदायमा आधारित पुनस्र्थापनापश्चात पछिल्लो समयमा समुदायमा आधारित समावेशी विकासको अवधारणा आएको जानकारी दिइन् ।

उनले दृष्टिकोण, सञ्चार, पहँुचयुक्तता र सहभागिता (एसिएपी)को अवधारणा अनुसार अपांगता भएका व्यक्तिको सशक्तिकरण गर्नुपर्ने उल्लेख गरिन् । संस्थाले दृष्टिसम्बन्धी अपांगता भएका महिलाका लागि मोबाइल फोनको प्रयोग लगायत डिजिटल पहुँचयुक्ततासम्बन्धी अभिमुखीकरण गरेको छ । कार्यक्रममा राष्ट्रिय अपांग महासंघ गण्डकी प्रदेशका अध्यक्ष खोमराज शर्मा सुवेदीले सहजीकरण गरेका छन् । प्रयत्न नेपालले दृष्टिविहीन महिलाको दैनिक जीवन यापन, रोजगारी र आत्मरक्षा सीप प्रदान गर्दै आएको छ ।