पोखरा ।
संघीय सरकारमा एमालेसहितको नयाँ गठन बनेसँगै प्रदेश सरकार पनि फेरबदल हुने निश्चित भएको छ । केन्द्रीय सत्ता समिकरणमा आएकाे फेरबदलीसँगै गण्डकी प्रदेश सरकारमा हलचल आएको छ । यद्यपि नयाँ सत्ता गठबन्धनका दलहरु केन्द्रको निर्णय कुरेर बसिरहेका बताएका छन् ।

गण्डकीमा नयाँ सत्ता गठबन्धनको ठूलो दल नेकपा एमाले पनि केन्द्रको निर्णय कुरेर बसिरहेको जनाएको छ । दलका नेता खगराज अधिकारीले नयाँ गठबन्धनमा अब कसले सरकार बनाउने भन्ने कुरामा छलफल हुने बताए । उनले भने, ‘नयाँ गठबन्धनमा केन्द्रबाट जे निर्णय आउँछ, सोही अनुसार अघि बढ्ने त हो ।’

माओवादी संसदीय दलका नेता हरिबहादुर चुमानले केन्द्रको निर्णय कुरेर बसेको सुनाए । उनका अनुसार प्रदेशमा सरकार परिवर्तन हुने निश्चित भएपनि अब कसको सरकार बन्ने निश्चित नभएको बताए । यद्यपि केन्द्रको निर्देशन नै कुरिरहेको उनले सुनाए । ‘प्रदेशमा पक्कै पनि नयाँ समिकरण लागु हुन्छ । सरकारहरु चेञ्ज हुन्छ । नयाँ कुरा होइन, शीर्ष नेताहरुले जे निर्णय गर्नुहुन्छ, प्रदेशमा पनि सोही हुने त हो,’ उनले भने, ‘नयाँ गठबन्धन भर्खरै चेञ्ज भएकाले एमालेसँग कुरा भएको छैन । नेतृत्व गर्ने कुरामा माओवादीको दाबी त स्वभाविक नै हुन्छ ।’

६० सदस्यी गण्डकी प्रदेश सभामा सरकार बनाउन ३१ सदस्यको आवश्यकता पर्छ । गण्डकी प्रदेशमा २७ सिटसहित नेपाली कांग्रेस सबैभन्दा ठूलो दल हो । दोस्रो ठूलो दल हो नेकपा एमाले । एमालेका उपसभामुख सहित २२ जना सांसद छन् । माओवादी केन्द्रको सभामुखसहित ८ सांसद हुन् भने एकीकृत समभाजवादीको १ र राप्रपाको २ जना सांसद छन् ।

नयाँ सत्ता गठबन्धमा एमाले र माओवादीले मात्र सरकार बनाउन सम्भव छैन । राप्रपाको साथ भए सहजै बन्छ । तर राप्रपा केन्द्रमा प्रतिपक्षमा रहने भएका प्रदेशमा सत्तारुढ हुने सम्भावना छैन । त्यसैले नेकपा एसमा लागेका राजीव गुरुङ उर्फ दीपक मनाङेको साथ अनिवार्य छ । तर नेकपा एस यो गठबन्धनमा रहने नरहने अझै निश्चित छैन । यद्यपी माओवादीले गठबन्धनमा एसलाई पनि राख्ने निर्णय गरेको छ ।

केन्द्रमा माओवादीकै नेतृत्वमा सरकार हुँदा गण्डकीमा एमालेका स‍ंसदीय दलका नेता खगराज अधिकारी मुख्यमन्त्री हुने एमाले नेताको आकलन छ । अघिल्लो पटक छोटो समय मात्र मुख्यमन्त्री बन्न पाएका खगराजको पक्षमा माओवादी नेतृत्व पनि रहेको बताइएकाे छ ।