पहिलो दिन भेट्रान्सतर्फ ४ खेल

समाधान संवाददाता २०८० फागुन २३ गते ११:१०

पोखरा ।
पुन एकता क्लब पोखराको आयोजनामा मंगलबारदेखि खुला बास्केटबल प्रतियोगिता सुरु भएको छ । रामघाटस्थित पुन समाज घरको बास्केटबल कोर्टमा फागुन २६ गतेसम्म सञ्चालन हुने प्रतियोगिता गण्डकी खेलकुद परिषद्का उपाध्यक्ष ध्वजकुमार गुरुङले उद्घाटन गरेका हुन् ।

Advertisement


५ दिनसम्म हुने प्रतियोगिता पुरुष, महिला र पुरुष भेट्रान्स गरी ३ विधामा सञ्चालन हुनेछ । प्रतियोगिता उद्घाटनपछि उपाध्यक्ष गुरुङले खेलाडी उत्पादनमा प्रतियोगिताको भूमिका उत्कृष्ट रहने बताए । प्रतियोगिताले बास्केटबल खेलको विकासमा ठूलो टेवा पुग्ने उनको भनाइ छ । उनले आगामी दिनमासमेत प्रतियोगितालाई निरन्तरता दिन सुझाव दिदैं आफ्नो तर्फदेखि सक्दो सहयोग गर्ने प्रतिबद्धतासमेत व्यक्त गरे ।


प्रतियोगिता अन्तर्गत पहिलो दिन भेट्रान्सतर्फको ४ खेल भएको प्रतियोगिता संयोजक रनसिंह गर्बुजाले जानकारी दिए । पहिलो खेलमा एक्स एबिसीले अर्चलबोटलाई ६९–३३ स्कोरले पराजित ग¥यो । दोस्रो खेलमा लामाचौरले रामबजारलाई ५४–४३ ले हरायो । त्यसपछिको खेलमा लामाचौरले सात गाउँ पुन मगर समाजलाई ५४–४६ ले जित दर्ता गर्‍यो । अन्तिम खेलमा अर्चलबोटलाई कास्की भेट्रान्सले ५६–४२ ले जितेको क्लबका सदस्य राजेन्द्र पुनले जानकारी दिए ।


बुधबार भेट्रान्सतर्फ सात गाउँ पुन मगर समाज र रामबजारबिच पहिलो खेल हुनेछ । त्यसपछि पुरुषतर्फका खेल हुने उनले जानकारी दिए । प्रतियोगितामा पुरुषतर्फ प्रथम हुने टिमलाई १ लाख रुपैयाँ नगदसहित ट्रफी, मेडल, पुरस्कार प्रदान गरिने क्लबका अध्यक्ष सुदिप पुर्जाले जानकारी दिए । द्वितीय हुने टिमले ५० हजार रुपैयाँ नगदसहित ट्रफी, मेडल र प्रमाणपत्र प्राप्त गर्ने छ ।


भेट्रान्सतर्फ प्रथमले ३५ हजार र द्वितीयले १७ हजार ५ सय नगदसहित ट्रफी, मेडल र प्रमाणपत्र प्राप्त गर्ने अध्यक्ष पुर्जाले जानकारी दिए । महिलातर्फ विजेताले २० हजार र उपविजेताले १० हजार रुपैयाँसहित ट्रफी, मेडल र प्रमाणपत्र प्रदान गरिने उनले सुनाए ।

Advertisement

तपाईको प्रतिक्रिया