लेखनाथ ।
पोखरा महानगरपालिका वडा २६ को अर्घौमा रहेको सिर्जना बहिरा आवासीय माविमा अध्यानरत विद्यार्थीलाई कफी बनाउने तालिम दिइएको छ । सो स्कुलमा कक्षा १२ का विद्यार्थीलाई एक हप्ते बबल टी एन्ड कफी बनाउने तालिम दिइएको हो ।

बहिरा नागरिकका लागि तालिमपश्चात रोजगार प्रवद्धनमा सहयोग पुग्ने अपेक्षा गरिएको छ । पोखरा महानगरपालिका वडा नं २६ र २७ को आर्थिक सहयोगमा तालिम भएको हो । विद्यालय व्यवस्थापन समिति अध्यक्ष प्रकाशलाल श्रेष्ठको अध्यक्षतामा भएको कार्यक्रममा सहभागीलाई प्रमाण पत्र वितरण गर्दै पोखरा महानगरपालिका व्यवसाय प्रवद्धन केन्द्रका प्रमुख नवराज अधिकारीले नेपालदेखि विदेशमा समेत कफीको राम्रो बजार रहेकाले सीप सिकेर स्वरोजगार बन्नका लागि अनुरोध गरे ।

कार्यक्रममा विद्यालयका प्रधानाध्यापक सुनील भण्डारी, लायन्स क्लब अफ पोखरा अर्घौका द्वितीय उपाध्यक्ष रामचन्द्र श्रेष्ठ, पूर्वशिक्षक सूर्यमोहन बराल, शिक्षक कृष्णकुमारी बराल, उदय भट्ट लगायतले बोलेका थिए ।