पोखरा ।
कोशिश कास्कीले मानसिक तथा मनोसामाजिक अपांगताको क्षेत्रमा बजेट बिनियोजन गर्न र प्राथमिकतामा राख्न माग गरेको छ । शुक्रबार संस्थाले सामाजिक विकास तथा स्वास्थ्य मन्त्रालय र सामाजिक बिकास मन्त्रालयमा ज्ञापन पत्र बुझाउँदै उक्त माग गरेको अध्यक्ष अर्जुन सुनारले जानकारी दिए ।

ज्ञापन पत्रमा प्रदेशमा मानसिक स्वास्थ्य सेवामा टेलिहेल्थ सेवालाई स्थानीय अस्पतालमा जोड्न, प्रदेश स्तरीय स्वास्थ्य संस्थामा जनशक्ति, भौतिक संरचना तथा औषधीको व्यवस्थापन गर्न, बिमाबाट उपलब्ध औषधिको ब्यवस्थापन गर्न, मानसिक स्वास्थ्यसम्बन्धी कर्मचारी र स्वास्थ्यकर्मीलाई तालिम दिन अनुरोध गरिएको छ ।

जनस्वास्थ्यका सबै कार्यक्रममा मानसिक स्वास्थ्य सेवालाई एकीकृत गर्न, वार्षिक बजेटको परिचालन गरी मानसिक स्वास्थ्यको क्षेत्रमा कार्यरत गैह्रसरकारी तथा निजी सस्थासँग साझेदारी गर्न, एक विद्यालय एक मनोविमर्शकर्ता व्यवस्था गर्नसमेत माग गरिएको छ ।

स्वास्थ्य मन्त्रालयका उपसचिव चण्डिका पौडेलले मागहरु सकारात्मक भएको बताए । उनले मागका बिषयमा छलफल हुने र कार्यन्वयनका लागि पहल गर्ने आश्वासन दिए । गएको कात्तिकमा कास्कीमा कोशिश कास्की दर्ता भएको हो ।