पोखरा ।
सरकारले नेपाल पर्यटन बोर्डको कार्यकारी समितिको रिक्त ३ सदस्य पदमा मनोनयन गरेको छ । तर पोखराका कोही पनि परेका छैनन् । मन्त्रिपरिषद्को बिहीबार बसेको बैठकबाट तीन सदस्य मनोनयन गरिएको हो ।

ऋषिराम भण्डारी, राजेन्द्रबहादुर लामा र रामप्रसाद सापकोटालाई मनोनयन गरिएको सञ्चार तथा सूचना प्रविधिमन्त्री रेखा शर्माको सचिवालयले जानकारी गराएको छ । यीमध्ये भण्डारीको घरठेगानाचाहिँ कास्की हो । तर उनको कास्कीमा पर्यटन व्यवसाय नरहेको बरु काठमाडौं रहेको पोखरेली व्यवसायी बताउँछन् ।

पोखराका पर्यटन व्यवसायीले बोर्डमा पोखरालाई कर्मथलो बनाएका व्यवसायीमध्येबाट नियुक्त गर्न प्रधानमन्त्री पुष्पकमल दाहालसँग मागसमेत गरेका थिए । चैत ४ गते प्रधानमन्त्री दाहालले नै पोखरालाई पर्यटन राजधानी घोषणा गरेका थिए । सोही मौकामा पर्यटनकर्मीहरुले ज्ञापनपत्र बुझाउँदै पर्यटन बोर्ड सदस्यमा पोखराबाट पनि प्रतिनिधित्व सुनिश्चित हुनुपर्ने माग गरेका थिए ।

पोखरा पर्यटन परिषदका अध्यक्ष पोमनारायण श्रेष्ठ पर्यटन राजधानीलाई बाइकट गरिएको गुनासो गरे । ‘यसबाट पर्यटन राजधानीलाई बेवास्ता गरिएको पुष्टि हुन्छ,’ उनले भने, ‘बोर्डले बजेटमा पनि पोखरालाई अन्याय गर्दै आएको छ, बोर्ड सदस्यमा पनि सरकारले नै पोखरालाई प्रतिनिधित्व नगराउनु दुखद हो ।’