पोखरा ।
दुवै मृगौलाले काम नगर्ने भएका गायक तथा कलाकार प्रसाद खप्तरीमगरलाई नेपाल मगर संघ रामबजार पोखराले रकम संकलन गरी हस्तान्तरण गरेको छ । संघले सञ्चालन गरेको रकम संकलन अभियानमा संकलन भएको ६१ हजार १ सय ५० रुपैयाँ संघका अध्यक्ष सुधा थापामगरले खप्तरीलाई हस्तान्तरण गरिन् ।

थुप्रै मौलिक तथा सांस्कृतिक गीत संगीतका सर्जक खप्तरी मगरले नेपाल मगर संघ रामबजारले निर्माण गरेको मौलिक सालैजो ‘म त परे मगर’ गीतमा समेत स्वर दिएका छन् । दुवै मृगौलाले काम गर्न छाडे पनि सबैको साथ, सहयोग र मायाले आफूलाई हौसला मिलेको बताउँदै खप्तरी मगरले सहयोग गर्ने सबैलाई धन्यवाद दिए ।