पोखरा ।
पोखरा महानगरपालिका वडा नम्बर ५ मालेपाटनस्थित सूर्यचन्द्र विकास समाजको उदघोषण तथा भाषणकला तालिम शनिबार सम्पन्न भएको छ । तालिमको जिल्ला समन्वय समिति कास्कीका प्रमुख लीलाधर पौडेलले उद्घाटन गरे ।

पौडेलले समाज बिकासको क्रम बोल्ने सिपबाटै सुरु हुने हुदा समाजका अगुवाहरू परिमार्जित र परिष्कृत हुन तालिम फलदायी हुने बताए । नेतृत्वमा हुनुपर्ने अनिवार्य सीप बोल्ने शैली भएको हुँदा समाजका हर क्षेत्रमा सो अत्यावश्यक भएको भन्दै सिकेका कुरा व्यवहारमा उतार्न उनले आग्रह गरे ।

पोखरा महानगरपालिका वडा नम्बर ५ का विभिन्न टोल विकास संस्थाका करिब ८० जनासहभागी रहेको तालिममा उदघोषण, भाषण र नेतृत्व विकासको बारेमा जमुना वर्षा शर्माले सहजीकरण गरेकी थिइन् ।

कार्यक्रम उदघाटन सत्रमा समाजका पूर्वअध्यक्ष कृष्णप्रसाद बराल, पोखरा महानगर कार्यपालिका सदस्य हरीमाया विश्वकर्मा, वडा सदस्यद्वय कल्पना भुवाजी क्षेत्री, गोविन्द पराजुली सहितले मन्तव्य व्यक्त गरेका थिए ।

समाजका अध्यक्ष कमला गौतमको अध्यक्षता सम्पन्न उदघाटन कार्यक्रममा, स्वागत उपाध्यक्ष सावित्री कोइराला र सञ्चालन महासचिब हेमराज भण्डारीले गरेका थिए ।