पोखरा ।
कास्कीका ५ वटा पालिकाका १५ वटा सामुदायिक विद्यालयका ३ सय विद्यार्थीले प्रधानमन्त्री पुष्पकमल दाहाल प्रचण्डलाई ‘मैले चाहेको शिक्षा’ शीर्षकमा पत्र पठाएका छन् । शिक्षाका लागि राष्ट्रिय अभियान (एनसिई नेपाल) कास्की र नागरिक समाजको अगुवाइमा विद्यार्थीहरुले लेखेको छुट्टाछुट्टै पत्र आइतबार प्रमुख जिल्ला अधिकारीमार्फत प्रधानमन्त्रीलाई पठाइएको हो ।

कास्कीका प्रमुख जिल्ला अधिकारी बासुदेव घिमिरेमार्फत गैसस महासंघ गण्डकीका अध्यक्ष गोपाल खड्का, इन्सेकका शिव खकुरेल, गोनेसाका शिवप्रसाद शर्मा, महिला मानव अधिकार रक्षक सञ्जालकी केशु भुजेल लागायतको संयोजकत्वमा पत्र पठाइएको हो ।

रुपान्तरणकारी शिक्षा आजको आवश्यकता रहेको बालबालिका आशय रहेको शिक्षाका लागि राष्ट्रिय अभियान कास्कीका संयोजकसमेत रहेका गोनेसाका शर्माले जानकारी दिए । विद्यार्थीले शिक्षामा राज्यको बजेट कम भएको र विद्यालयमा राजनीतिक बढी शिक्षा कम हुँदा शिक्षाको गुणस्तर खस्किएको आशयको पत्र लेखेका छन् ।

विद्यालय र सिकाइ केन्द्रहरूमा अनलाइन शिक्षा, विद्यालयको पाठ्यक्रममा समसामयिक पुनर्विचार, परिमार्जन र शिक्षालाई दैनिक जीवनसँग जोड्दै शिक्षालाई गुणस्तरीय बनाउन विद्यार्थीहरुले माग गरेका छन् । शिक्षालाई समावेशी, जीवन उपयोगी बनाउनुपर्ने माग विद्यार्थीको छ । उनीहरुले पत्रमा मुलभूत मैले चाहेको शिक्षामा केन्द्रीत भएर राय राखेको संयोजक शार्मले जानकारी दिए ।

‘विद्यार्थीहरुले पठाएको पत्र हामीहरुले अध्ययन गर्दा बजेट कम भएको र सरकारले बजेट वृद्धि गरि गुणस्तरीय प्रविधिमैत्री, व्यवहारिक शिक्षा हुनुमा जोड दिएको संयोजक शर्माले बताए । शिक्षाका लागि राष्ट्रिय अभियान–नेपालले विद्यार्थीहरुलाई कस्तो शिक्षा आवश्यक छ’ भन्ने शीर्षकमा पत्र लेख्न आह्वान गरेको थियो ।

नेपालको सार्वजनिक शिक्षा सुदृढीकरणको अभियानमा क्रियाशील शिक्षाका लागि राष्ट्रिय अभियान तीनै तहका सरकारलाई जवाफदेही बनाउने उद्देश्यका साथ काम गर्दै आएको संयोजक शर्माले जानकारी दिए । यसले सन् २००३ देखि प्रत्येक वर्ष शिक्षाका लागि विश्वव्यापी कार्यसप्ताह मनाउँदै आएको छ ।

शिक्षाका लागि विश्वव्यापी कार्यसप्ताहको समयमा सञ्चालन गरिने क्रियाकलापहरुले शिक्षा क्षेत्रका विभिन्न सवाल तथा समसामयिक विषयहरुमा सरोकारवाला निकायहरुको ध्यानाकर्षण समेत गराउँदै आएको छ ।

यस वर्ष पनि शिक्षाका लागि विश्वव्यापी कार्यसप्ताह ट्रान्सफर्मेटिभ एजुकेसन भन्ने मूल नाराका साथ २०८१ वैशाख १०देखि १४ मनाएको थियो । यसले देशभरका सामुदायिक विद्यालयबाट विद्यार्थीहरुको राय संकलन गर्ने संयोजक शर्माले जानकारी दिए ।