पोखरा ।
मातातीर्थ औंसीको अवसरमा गायिका अम्बिका भण्डारीको नयाँ गीत बजारमा आएको छ । यही वैशाखमा सासूआमा र केही वर्षअघि आमा गुमाएकी अम्बिकाले आमाहरुप्रति समर्पित गर्दै ‘आमाको मन’ बजारमा ल्याएकी हुन् ।

उनको आफ्नै युट्युब च्यानलबाट गीतको म्युजिक भिडियो बुधबार सार्वजनिक भएको हो । विदेश जाने छोराछोरी र आमाको पीडा गीतमा समेटिएको छ । गायिका भण्डारीका छोराबुहारी र छोरीसमेत यही वर्ष परदेशिएका छन् ।

गायिका अम्बिकाले आफ्नो जस्तै धेरै नेपालीका पीडालाई गीतमार्फत् अभिव्यक्त गरेको सुनाइन् । ‘आमा औंसी यता आमाहरु, विदेशमा छोराछोरी भक्कानिने दिन बनेको छ । सबै आमाहरुप्रति समर्पित यो गीत पाठकले मन पराइदिनुहुन्छ भन्ने विश्वास छ,’ उनले भनिन् ।

गीतमा शब्द र स्वर भण्डारीसँगै रामजी पौडेलको छ । गीतको कोरसमा अनिल चापागाई, प्रकाश पौडेल, माया केसी, रोशनी घर्तीले साथ दिएका छन् । म्युजिक भिडियोको एरेन्ज दिवश थापामगर र निर्माता गोपाल भण्डारी छन् ।

बाँसुरी डिजिटल स्टुडियो पोखरामा गीत रेकर्ड भएको हो । भिडियोमा अभिनय रमेश भण्डारी, अम्बिका भण्डारी, राम भण्डारी, सुहाना भण्डारी लगायतको छ । नृत्य रश्मि भण्डारी, प्रमिसा भण्डारी, सुनिधी शर्मा, मनिसा सुनार, निर्देशन शिवराज भुर्तेल लगायतले गरेका छन् ।

सप्तरंगी साहित्य समाजकी अध्यक्षसमेत रहेकी अम्बिकाका दुई दर्जनभन्दा बढी गीत र ४ पुस्तक प्रकाशित छन् ।