पोखराको हरिचोकबाट हेम्जाको प्रवेशद्वार याम्दीको दुरी २ किलोमिटर छ । यति छोटो सडक स्तरोन्नतिको काम २ वर्षमा पनि पूरा भएको छैन । हरिबिजोग छ सडकको । स्थानीय दबाब दिएका छैनन् कि जनप्रतिनिधिले । तर निर्माण कम्पनीले विभिन्न बहाना बनाउँदै काममा ढिलासुस्ती गरिरहेको छ । साविक धौलागिरी क्षेत्रबाट पोखरा प्रवेश गर्ने मुख्य सडकमार्गको अवस्था दुर्दशापूर्ण छ । स्थानीयवासी पनि धुलो र हिलोले हैरान छन् । यातायातका साधन गुड्न मुस्किल छ । यातायातका साधन यस्ता सडकमा गुड्दा नै थोत्रिने । अनि यात्रुलाई हुने सास्ती पनि भनिसाध्य छैन ।

याम्दीपछि मध्यपहाडी लोकमार्ग भनेर फराकिलो सडक ४ लेनको बनेको छ । हरिचोकभन्दा तल पनि फराकिलो सडक छ जिरोकिमीसम्मै । तर बीचको खण्ड भने अलपत्र छ । ग्राभेल हालेर खाल्डाखुल्डी पुर्ने र पानी तर्काउने काम पनि भएको छैन । काठमाडौँको मोतीदान कन्स्ट्रक्सन सेवा प्रालिले हो त्यो सडक निर्माणको जिम्मा पाएको । त्यसैले गरेको छ त्यहाँ अटेरी ।

अनि कन्तबिजोग बनाएर सडक अलपत्र छाडेको छ । २ वर्षभित्र निर्माण सक्नुपर्ने थियो । तर सुरु नै नभएको होइन कि बिगारेर, भत्काएर चौपट पारिएको छ । यो सडक खण्ड त्यही हो, जहाँबाट साविक धौलागिरीका बासिन्दामात्रै ओहोरदोहोर गर्दैनन्, मुस्ताङ जाने पर्यटक पनि यही बाटो नगई धरै छैन । बागलुङ हुँदै रुकुम पूर्व पनि यही बाटो हुँदै गइन्छ ।

निर्माण कम्पनीले भुक्तानी पाएको छैन भने मध्यपहाडी लोकमार्ग आयोजनाको पर्वत कार्यालयले त्यो समस्या सुल्झाउनुपर्छ । पोखराका स्थानीय जनप्रतिनिधिको बसको बात होइन हो । संघीय जनप्रतिनिधिले नै भुक्तानीका लागि पहल कदमी लिनुपर्छ । पर्वत, पोखरा वा जहाँका प्रतिनिधिले पहल लिए पनि हुन्छ । तर त्यही सडकबाट गुज्रने कतिपय जनप्रतिनिधिले त्यता ध्यान पुर्‍याएका छैनन् ।

आफैले दुख पाएर यात्रा गर्दा पनि वास्ता नगरेको सडक जनताका लागि उनीहरु के गर्थे भन्नेजस्ता गुनासा पनि छन् । सरकारले यस्ता महत्वपूर्ण सडक खण्डलाई बिचमै अलपत्र पार्नु हुँदैन । थोत्रा सडकमा गुड्दा गाडी थोत्रिएर हुन नाक्सानी पनि राज्यकै हो । जनताले दुख पाएका छन् भने त्यसबाट तार्ने प्रमुख कर्तव्य झन् राज्यकै हो ।