पोखरा ।
अपांग महिला सशक्तीकरण केन्द्र कास्कीले गुणस्तरीय प्रजनन् स्वास्थ्य र अधिकारको बारेमा विद्यालय स्तरीय सचेतनामूलक कार्यक्रम गरेको छ । पोखरा २६को सिर्जना बहिरा मावि लेखनाथ, पोखरा १२ को अमरसिंह मावि भएको कार्यक्रममा ९१ विद्यार्थी र ९ शिक्षक तथा कर्मचारीको सहभागिता रहेको केन्द्रका अध्यक्ष अञ्जना केसीले जानकारी दिइन् ।

कार्यक्रममा संस्थाका अध्यक्ष केसी, महासचिव सम्झना गुरुङ, कर्मचारी सरिता केसीले सहजीकरण गरेका थिए । कार्यक्रममा अध्यक्ष केसीले अपांगताको परिभाषा तथा प्रकार, महिनाबारी, सुरक्षित गर्भपतन, परिवार नियोजनका साधनको प्रयोग, पाठेघर र स्तन क्यान्सरको बारेमा सहजीकरण गरिएको बताइन् ।

सहभागी विद्यार्थीले महिनाबारी भएको अवधिमा भोग्नुपरेको समस्या र सरकारी स्वास्थ्य संस्था अपांगमैत्री नहँुदा सेवा लिन भएको कठिनाइबारे बोलेका थिए ।