पुम्दीकोट गण्डकी क्षेत्रकै आकर्षणः प्रदेश प्रमुख

समाधान संवाददाता २०८१ जेठ १ गते १४:२९

पोखरा ।
गण्डकी प्रदेशका प्रमुख डिल्लीराज भट्टले पोखराको पुम्दीकोट स्थित विशाल शिव मूर्ति गण्डकी प्रदेशकै उत्कृष्ट पर्यटकीय गन्तव्य रहेको बताएका छन् । यहाँको प्रमुख पर्यटकीय आकर्षण बनिरहेको पुम्दीकोटमा आइतबार अवलोकन भ्रमण गर्दै प्रदेश प्रमुख भट्टले विशाल शिव मूर्ति आन्तरिक तथा बाह्य पर्यटकको आकर्षणको केन्द्र बन्दा पर्यटनलाई टेवा पुगेको उल्लेख गरे ।


उनले सरकारले पोखरालाई पर्यटनको राजधानी घोषणा गरिसकेको सन्दर्भमा यस्ता पर्यटकीय गन्तव्य महत्वपूर्ण रहेको पनि बताए । ‘विशाल मूर्तिले यहाँ पर्यटकको बसाइ लम्ब्याउनुका साथै धार्मिक पर्यटकका लागि उत्कृष्ट गन्तव्य बनाउन सहयोगी बनेकोमा खुशी लागेको छ । मन्दिरसँगै बनेका अन्य संरचनाहरुले पनि पुम्दीकोटलाई थप आकर्षक बनाएको छ,’ प्रदेश प्रमुख भट्टले भने ।


यसका परिकल्पनाकार तथा पुम्दीकोट कोट विकास समितिका अध्यक्ष चन्द्रकान्त बरालले छोटो समयमै पुम्दीकोटले धार्मिक पर्यटकीय गन्तव्य स्थलका रूपमा विशिष्ट पहिचान बनाएको बताउँदै थप आकर्षकीय संरचना निर्माणको चरणमा रहेको जनाए । पोखरा २२ स्थित पुम्दीकोटमा निर्माण भएको ५२ फिट अग्लो शिव मूर्ति मुख्य आकर्षण रहँदा नजिकै सुमेरु पर्वत नामाकरण गरी पार्वती र कुमारको पनि मूर्ति स्थापना गरिएको छ ।

Advertisement


शिवको बृहत् चिनारीसहित १ सय ८ शिवलिंग, १ सय ८ स्वर्गद्वारी सिँढी, गुरु महाराज आश्रम, हरियाली बगैँचा, शान्ति स्तम्भ, ज्येष्ठ नागरिक मिलन केन्द्र, ध्यान केन्द्र, पार्किङ स्थल लगायतका संरचना निर्मण भइसकेका छन् । सरकारबाट प्राप्त २२ रोपनी जग्गामा २७ करोड लगानीमा निर्माण भएको संरचनामा ७ करोड सरकारी सहयोग र अन्य २० करोड महायज्ञ, संघ, संस्था, व्यक्ति तथा भक्तजनबाट संकलन गरिएको अध्यक्ष बरालले जानकारी दिए ।


निजी क्षेत्रबाट साहसिक खेलसहित सुविधासम्पन्न ड्रिम सिटी पुम्दी पनि सञ्चालनमा आएको छ । जहाँ ३५ जनाले रोजगारी पाएको सञ्चालक राजु बराल बताउँछन् । परिकल्पनाकार तथा अध्यक्ष बराल लगायत पदाधिकारीले प्रदेश प्रमुखसहित टोलीलाई स्वागत गर्दै भूमेश्वर महादेव मन्दिर, कैलाश पर्वत, सुमेरु पर्वतलगायत निर्मित संरचनाका बारेमा जानकारी गराए ।

Advertisement


पोखराको मुख्य बजारबाट आधा घण्टाकै पुग्न सकिने पुम्दीकोटबाट माछापुच्छ्रे सहित अन्नपूर्ण हिमशृङ्खला, फेवाताल, पोखरा बजार क्षेत्रको मनोरम दृश्य देख्न सकिन्छ ।

तपाईको प्रतिक्रिया