जोमसोम—राउण्ड अन्नपूर्ण चर्किय पदमार्ग अन्तर्गत मनाङबाट मुस्ताङतर्फ ट्रेकिङ पदयात्रा गर्दै गरेका दुई भारतीय पर्यटकको बिहिबार हेलिकोप्टर मार्फत सकुशल उद्दार गरिएको छ ।
१० जना भारतीय पर्यटक र ६ जना पथप्रर्दशक भरियासहित १६ जनाको टोली मनाङ र मुस्ताङको सीमाक्षेत्र थोरङ्लापास हुँदै मुक्तिनाथ आउने क्रममा प्रतिकुल मौसमका कारण टोली मध्ये २ जना भारतीय बुधबार दिउँसो सम्पर्कविहीन भएका थिए । उनीहरुको सुरक्षा निकायको समन्यमा हेलि मार्फत सकुशल उद्दार गरिएको जिल्ला प्रहरी कार्यालय मुस्ताङले जनाएको छ ।
काठमान्डौंस्थित हिमालयन ओन्ड्रस ट्रेनिङ एजेन्सी मार्फत ७ जना पुरुष र ३ जना महिला भारतीय पर्यटकसहित १६ जनाको टोली मनाङ हुँदै मुस्ताङ झर्ने क्रममा मुस्ताङको वारागुुङ मुक्तिक्षेत्र—२ मा पर्ने मनाङ र मुस्ताङको सीमाना थोरङ्लापासमा टोली मध्ये टोनी पार्रमर र अमनज्योति पार्रमर प्रतिकुल मौसमका कारण सम्पर्कविहिन भएका थिए । उनीहरु दुबै श्रीमान ÷श्रीमती हुन् । दुबै जना भारतस्थित मुम्बईका नागरिक हुन् ।
प्रतिकुल मौसमका कारण थोरङ्लापासमा सम्पर्कविहीन भएका दुई भारतीय पर्यटकलाई खोजतलास गरिदिन बिहिबार बिहान ५ बजेर ३० मिनेट जाँदा ईलाका प्रहरी कार्यालय मुक्तिनाथलाई सूचना गरिएको थियो । भारतीय पर्यटक सम्पर्कविहीन भएको सूचनापछि जिल्ला प्रहरी कार्यालय मुस्ताङका डिएसपी भोजराज पाण्डेयको कमाण्डमा ७ जनाको प्रहरी टोली ,ईलाका प्रहरी कार्यालय मुक्तिनाथबाट प्रहरी सहायक निरीक्षक गिरुप्रसाद पौडेलको कमाण्डमा २ जना प्रहरी टोली र नारायण दल गण जोमसोमबाट चिकित्सकसहित खटिएको १५ जनाको सुरक्षा टोली उद्दारमा खटिएको थियो । यसमा सुरक्षाकर्मीको टोलीसहित ट्रेकिङ पदयात्रामा सम्मिलित ३ जना पथप्रर्दशक टोली समेत उद्दारमा खटिएको थियो ।
सोमबार दिउँसो देखि सम्पर्कविहीन रहेका दुई भारतीय पर्यटकलाई मुस्ताङको वारागुङ मुक्तिक्षेत्र—२ स्थित थोरङ्लापासको तल टी—सपको छाप्रोमा खोजतलास गर्दा सकुशल फेला परेका थिए । सम्पर्कविहीन भारतीय पर्यटक श्रीमान टोनी पार्रमर र श्रीमती अमनज्योती पार्रमरलाई प्रहरी र नेपाली सेनाको समन्वयमा त्यहाँबाट उद्दार गरी एअर डाईनेष्टिकको हेलिकोप्टर मार्फत जोमसोम हुँदै काठमान्डौं उद्दार गरिएको मुस्ताङका डिएसपी भोजराज पाण्डेयले जानकारी दिए ।