पोखरा ।
कक्षा १२ को प्रश्न पत्र आउट गरेको आरोपमा पक्राउ परेका तीन जनालाई कास्की जिल्ला अदालतले छोड्न आदेश दिएको छ । अदालतका न्यायाधीश हरिप्रसाद कोइरालाको इजलासले बुधबार तीन जना मध्ये दुई जनासँग धरौटी माग र एक जनालाई साधारण तारिखमा छाड्न आदेश भएको सूचना अधिकारी सुरज अधिकारीले जानकारी दिए ।

पोखरा ११ फूलबारी बस्ने ३९ वर्षीय नारायण बास्तोला र सोही ठाउँका ३७ वर्षीय रामचन्द्र बास्तोला वैशाख १७ गते पक्राउ परेका थिए । जिल्ला अदालतले उनीहरुसँग १०/१० हजार धरौटी माग गरेको छ । पूजन बास्तोलालाई भने साधारण तारिखमा छाड्न आदेश दिएका सूचना अधिकारी अधिकारीले जानकारी दिए । पूजनलाई प्रहरीले केही दिनअघि मात्र पक्राउ गरेको थियो । दुई शिक्षक शिवशक्ति माध्यमिक विद्यालयमा अध्यापन गराउँदै आएका थिए । पूजन शिक्षक हुन् वा विद्यार्थी खुलाइएको छैन ।

वैशाख १६ गते आइतबार बिहान ९ बजे पोखरा ११ फूलबारी स्थित शिवशक्ति माध्यमिक विद्यालयमा सञ्चालन भइरहेको कक्षा १२ को सामाजिक शिक्षा विषयको प्रश्नपत्र विद्युतीय माध्यमबाट आउट गरेको आरोपमा उनीहरु पक्राउ परेका थिए । विद्यालयमा सञ्चालन भइरहेको प्रश्न पत्र परीक्षा अगावै आउट गरेको सूचना पाएपछि प्रहरीले उनीहरुलाई नियन्त्रणमा लिएको थियो ।

उनीहरुले प्रश्न पत्र आउट गरेको उजुरी गण्डकी प्रदेश प्रहरी कार्यालय र वडा प्रहरी कार्यालय रामबजारमा परेको थियो । प्रहरीले उनीहरुको साथबाट कक्षा १२ को थप उत्तर पुस्तिका ८ थान र मोबाइल फोन ३ थानसहित नियन्त्रणमा लिएको थियो । नियन्त्रणमा लिएर शिक्षा ऐन २०२८, अन्तर्गतको कसुरमा जिल्ला अदालतबाट अनुमति लिई अनुसन्धान गरेपछि सरकारी वकिलको कार्यालय मार्फत जिल्ला अदालत बुझाइएको थियो ।