पोखरा ।
पोखरा १७ तल्लो बिरौटामा अवस्थित फिस्टेल एकेडेमी माध्यमिक विद्यालयले जेठ ७ गतेबाट ९ गतेसम्म फिस्टेल एसइई कप २०८१ सञ्चालन गर्ने भएको छ । एसइई परीक्षा २०८० मा सहभागी भएका विद्यार्थीलाई लक्षित गरी प्रतियोगिता सञ्चालन गर्न लागिएको हो ।

प्रतियोगितामा छात्रतर्फ सेभेन ए साइड फुटबलमा ३३ समूह छन् । फुटबलमा छात्रातर्फ ३/३ र बास्केटबलमा ६ समूह सहभागी हुने छन् । प्रतियोगिता विद्यालयकै खेल मैदान तल्लो बिरौटा, पोखरा १७ मा सञ्चालन हुनेछ । औपचारिक उद्घाटन जेठ ७ गते हुने भए पनि ५ गते शनिबारबाट नै खेलहरू सञ्चालन हुने छन् ।

२०५१ सालमा स्थापना भएको यस विद्यालयले पोखरा र समग्र राष्ट्रिय स्तरमा नै गुणस्तरीय शिक्षाका माध्यमबाट अब्बल साबित गर्दै आएको छ । एसइई २०७९ मा ४ जिपिएसहित शतप्रतिशत विद्यार्थी उत्तीर्ण गराएको थियो ।

फिस्टेल आईबी पिवाईपी प्रस्तावित विद्यालयसमेत हो । शैक्षिक गुणस्तरका साथै विद्यार्थीको शारीरिक एवं संवेगात्मक विकासका लागि यस विद्यालयले अतिरिक्त क्रियाकलापलाई निकै सशक्त रूपमा अगाडि बढाउँदै आएको छ ।

गत मङ्सिरमा विद्यालय स्तरको प्रतियोतिाअन्तर्गत निकै ठूलो पुरस्कार राशि रहेको ‘फिस्टेल स्पोर्ट फेस्ट २०८०’ सम्पन्न गरेको विद्यालयले यस पटक भने प्रथम र द्वितीय पुरस्कारका रूपमा फुटबलतर्फ क्रमशः नगद १५ र १० हजार तथा बास्केटबलतर्फ क्रमशः १० र ५ हजार नगदका साथमा प्रमाणपत्र, मेडल र ट्रफी प्रदान गर्ने छ ।