पोखरा ।
नेपाल ट्रेड युनियन महासंघ (जिफन्ट) महिला कमिटी गण्डकी र लायन्स क्लब अफ पोखरा स्टार ग्लोरीले संयुक्त रुपमा बाथ रोगसम्बन्धी निशुल्क रगत परीक्षण तथा सचेतनामूलक कार्यक्रम गरेका छन् ।

नेसनल बाथ रोग सेन्टर मुस्ताङचोक पोखराको प्राविधिक सहयोगमा भएको शिविरमा ७२ जनाको स्वास्थ्य परीक्षण गरिएको अध्यक्ष संगीता पाण्डेले जानकारी दिइन् । कार्यक्रममा जिफन्ट संसदीय तथा स्थानीय तह संयोजन प्रमुख मिना गुरुङले महिलाले समाजमा धेरै गणना हुने काम गरेको बताइन् ।

उनले आर्थिक रुपमा सबल बन्न नसकेका श्रमिकको लागि शिविरले सहयोग पुगेको उल्लेख गरिन् । स्वास्थ्य नै धन र स्वास्थ्य नै समृद्धि भएको चर्चा गर्दै उनले स्वस्थ शरीर भएमात्र समाजका योगदान गर्न सकिने जानकारी दिइन् ।

लायन्स क्लब अफ ३२५ आईका निवर्तमान गभर्नर रामबहादुर बसेलले बेलैमा रोग पहिचान गर्न स्वास्थ्य शिविर र सचेतना कार्यक्रमको महत्व हुने बताए । जिफन्ट गण्डकी प्रदेश कमिटी अध्यक्ष रुद्रबहादुर खत्रीले मानव जीवनका लागि स्वास्थ्यको ठूलो महत्व भएको उल्लेख गरे । उनले श्रमिकको हक अधिकार, आन्दोलन हडतालका अलवा स्वास्थ्यलाई ध्यान दिन श्रमिकलाई आग्रह गरे ।

बाथ रोग विशेषज्ञ डा स्वीकृति श्रेष्ठले २ सयभन्दा बढी बाथ रोग पत्ता लागेको जानकारी दिइन् । उनले युरिक एसिडलाई आम बाथ रोगको रुपमा लिइने उल्लेख गरिन् ।

कार्यक्रममा जिफन्ट राष्ट्रिय कमिटी सदस्य पम्फा पहारी, जिफन्ट गण्डकी प्रदेश महिला कमिटी अध्यक्ष संगीता पाण्डे, सचिव ममता गौतम, लायन्स क्लबका जोन चियर पर्सन ज्ञानबहादुर राना, विद्या खनाल लगायतले बोलेका थिए ।