पोखरा ।

व्यवसाय प्रवद्र्धन केन्द्र पोखरा महानगरपालिकाको आयोजना एवम् नेपाली युवा उद्यमी मञ्चको सहकार्यमा सोमबारदेखि पोखरा आइडिया मार्ट तथा बुट क्याम्प सुरु भएको छ ।

३ दिनसम्म सञ्चालन हुने मार्टको पोखरा महानगरपालिकाका प्रमुख धनराज आचार्यले उद्घाटन गरे । कार्यक्रममा महानगरप्रमुख आचार्यले कार्यक्रममा युवाहरूले प्रस्तुत गर्ने हरेक आइडियाहरू समाजको उन्नयनका लागि प्रेरक बन्न सक्ने बताए ।

पोखरा महानगरपालिकाका प्रवक्ता मोतीलाल तिमल्सिनाले मार्टमा प्राप्त सबै आइडियालाई छलफल गरी त्यसलाई कार्यान्वयनमा ल्याउन सकिए त्यसले समाजमा विशिष्ट योगदान गर्न सक्ने धारणा राखे ।

कार्यक्रमका सभापति एवं पोखरा महानगरपालिका आर्थिक महाशाखा प्रमुख मनोहर कडरियाले मार्टमा सहभागिताका लागि आवेदन माग गरिएकोमा विभिन्न आइडियासहित ३५ वटा समूहले आवेदन प्रस्तुत गरेकोमा १९ वटा समूह छनोट भएको जानकारी दिए । १९ समूहमध्ये १७ वटा समूह मार्टमा सहभागी बनेको बताउँदै उनले तीमध्ये उत्कृष्ट १० छनोट गरिने सुनाए ।

उत्कृष्ट १० लाई पुनः सरोकारवालाबीच राखेर छलफल गर्दै तीमध्येबाट प्रथम, द्वितीय, तृतीय र चतुर्थलाई क्रमशः ५०, ४०, ३० र २० हजार रुपैयाँ नगदसहित पुरस्कृत गरिने उनले जानकारी दिए ।

व्यवसाय प्रवद्र्धन केन्द्रका प्रमुख नवराज अधिकारीले महानगरपालिकाले अघिल्लो वर्ष पनि मार्ट सञ्चालन गरेको बताउँदै सो क्रममा महानगरको आइडिया बैंकमा ३७ वटा आइडिया संकलन भइसकेको बताए ।

पोखरा उद्योग वाणिज्य संघका वरिष्ठ उपाध्यक्ष गोकर्ण कार्की, नेपाली युवा उद्यमी मञ्चका अध्यक्ष नीरज केसी, मुख्य प्रशिक्षक नीरज खनाल लगायतले मार्टमा प्राप्त आइडियालाई कार्यान्वयनको तहमा लैजानुपर्ने आवश्यकता औंल्याए ।