पोखरा ।

पोखरा महानगरपालिका वडा नम्बर १२ ले राजस्व संकलनका लागि घरदैलो सुरू गरेको छ । पुरानोधारा, शितलादेवी, गौँडाको मुख, हस्पिटल चोक र अमरसिंह चोकका पसल र व्यवसायहरुमा राजस्व सचेतना अभियान गर्न लागेका वडाध्यक्ष सन्तोष बास्तोलाले जानकारी दिए ।

राजस्व संकलन प्रभावकारी बनाउन र लक्ष्य भेट्टाउन घरदैलो अभियान गरिएको उनले भने ।

व्यवसाय दर्ता र नवीकरणका लागि समेत अभियानमार्फत आग्रह गरिएको वडा सचिव महेश्वर अर्यालले जानकारी दिए ।

‘चालू आर्थिक वर्षमा पोखरा महानगरपालिकाले ३ अर्ब ७२ करोड रुपैयाँ संकलनको लक्ष्य लिएको छ । यस अवधि सम्ममा कार्यालयले लगभग ५० प्रतिशतको हाराहारिमा मात्र असुल गर्न सकेको छ ।’ बास्ताेलाले भने ।

आर्थिक मन्दीका कारण पोखरामा व्यापार घटेको छ, यसको राजस्व संकलनमा प्रत्यक्ष असर परेको वडाको राजस्व शाखा प्रमुख हरिमाया वाग्लेले जानकारी दिइन् ।