रत्नशोभा माविमा नेतृत्व विकास तालिम

समाधान संवाददाता २०८१ जेठ १३ गते १२:५५

लेखनाथ ।
सामुदायिक विद्यालयका सरोकारवालाहरुका लागि नेतृत्व विकास तालिम भएको छ । शैक्षिक प्रशासन महाशाखाको आयोजनामा र रत्नशोभा माध्यमिक विद्यालय पोखरा २८ माझठानाको व्यवस्थापनमा २ दिन सञ्चालन भएको नेतृत्व विकास तालिम शुक्रबार सम्पन्न भएको हो ।


शैक्षिक प्रशासन महाशाखा पोखराका शिक्षा अधिकृत एवं प्रशिक्षक सोमनाथ भण्डारीले सामुदायिक विद्यालयमा गुणस्तरीय शिक्षा, विद्यार्थी संख्या घट्नुका कारण, विद्यालय व्यवस्थापन समितिले गर्नुपर्ने कार्यहरु, विद्यालयका प्रशासनको जिम्मेवारी, शिक्षकहरु, विद्यार्थीहरु, कर्मचारीहरु र अभिभावकहरुको जिम्मेवारी, नेतृत्वमा हुनुपर्ने गुणहरु र सकारात्मक सोच लगायतका विविध विषयमा प्रशिक्षण दिएका थिए ।


भण्डारीले विद्यालयमा भएका साधन स्रोतलाई सही तरिकाले प्रयोग गर्दै जिम्मेवारी बाँडफाँड गरी सामूहिक रुपमा गर्ने बानीको विकासले मात्रै गन्तव्यमा पुग्न सकिने बताए । सामुदायिक विद्यालयमा भौतिक संरचनालाई मात्रै ध्यान दिंदा शिक्षण सिकाइमा ध्यान नगएकोप्रति सचेत गराउँदै सामुदायिक विद्यालयमा जागरणको अभ्यास गरी अभिभावकको विश्वास जित्नुपर्ने अहिलेको आवश्यकता भएको औंल्याए ।

Advertisement


शिक्षा तथा विकास केन्द्र गण्डकी प्रदेशका प्रशिक्षक शंकर पोखरलले सामुदायिक विद्यालयमा व्यावहारिक शिक्षाको आवश्यकता, शिक्षण सिकाइका आधार, व्यावहारिक शिक्षाका वाधक तत्वहरु, स्वजागरण विधि, उत्प्रेरणा, योग, साधना, संवादका चरणहरु, नेतृत्व र अरुसँगको सम्बन्ध लगायतका विविध विषयमा प्रशिक्षण दिए । उनले नेतृत्व ठीक, बेठीक र विवाद भन्दा माथि उठेर सर्वविजयी बन्नुपर्नेमा जोड दिए ।


समापनका अनवसरमा रत्नशोभा माध्यमिक विद्यालय व्यवस्थापन समितिका अध्यक्ष कृष्णप्रसाद तिमिल्सेनाले तालिम अति नै उपयोगी भएको सुनाए । भुर्तेल आधारभूत विद्यालय व्यवस्थापन समितिका अध्यक्ष मित्रलाल बास्तोलाले सामुदायिक विद्यालयमा विद्यार्थी संख्या टिकाउन चुनौती रहेको बताए ।

Advertisement


रत्नशोभा माध्यमिक विद्यालय विद्यालय व्यवस्थापन समितिका सदस्य हिमलाल आचार्यले यस्ता किसिमको तालिम अभिभावकहरु, शिक्षकहरु, विद्यार्थीहरु लगायत सरोकारावाला सबैलाई आवश्यक भएको औंल्याए ।


तालिममा पोखरा महानगरपालिका वडा नम्बर २८ स्थित भुर्तेल आधारभूत विद्यालयका व्यवस्थापन समितिका पदाधिकारीहरु, शिक्षक अभिभावक संघका पदाधिकारीहरु, शिक्षकहरु, बालक्लबका प्रतिनिधि विद्यार्थीहरु र रत्नशोभा माध्यमिक विद्यालय व्यवस्थापन सममितिका पदाधिकारीहरु, शिक्षक अभिभावक संघका पदाधिकारीहरु, शिक्षकहरु र जुनियर युवा रेडक्रस सर्कल र बाल क्लबका प्रतिनिधि विद्यार्थीहरुको सहभागिता थियो ।

तपाईको प्रतिक्रिया