जोमसोम ।

मुस्ताङको वारागुङ मुक्तिक्षेत्र गाउँपालिका—१ पुराङ रानीपौवाको एक होटलमा चोरी गरेर फरार एक युवा पक्राउ परेका छन् । नुवाकोटका १९ वर्षीय सुशान्त गुरुङलाई बेनी चेक पोष्टबाट म्याग्दी प्रहरीले पक्राउ गरेको हो ।

होटल बपमार्लीमा रहेको काठको टिप्स बाकस र अर्को होटलको हिसाब राख्ने बाकसमा राखिएको ४५ हजार चोरी गरेर उनी फरार भएका थिए ।

ट्याक्सी चढेर पोखरातर्फ जाँदै गर्दा उनलाई बेनीमा प्रहरीले पक्राउ गरेर जोमसोम पठाएको मुस्ताङका डिएसपी भोजराज पाण्डेयले जानकारी दिए । उनको साथबाट ४२ हजार ८७५ रुपैयाँ नगद बरामत भएको डिएसपी पाण्डेले उल्लेख गरे ।

घटना बारेमा आवश्यक अनुसन्धान भइरहेको मुस्ताङ प्रहरीले जनाएको छ ।