मध्यपहाडी लोकमार्गले लेखनाथमा खानेपानी प्रभावित

समाधान संवाददाता २०८१ जेठ १७ गते १३:३४

लेखनाथ ।
राष्ट्रिय गौरवको योजनाका रुपमा रहेको मध्यपहाडी लोकमार्ग निर्माणको क्रममा लेखनाथ खानेपानी उपभोक्ता संस्थाको पानी वितरण प्रणाली प्रभावित भएको छ ।


पानीको मुहान भन्दा माथी मादी ७ को पानीघाँट र पोखरा २० को आटीघर मौजाको भागमा बाटो खन्ने क्रममा आएको ढुंगा तथा माटोका कारणले खानेपानी सप्लाई अवरुद्ध भएको हो ।


वर्षाका कारण आएको बाढिले पानी संकलन केन्द्रमा ढुंगा, माटो थुपारेकाले पानी वितरणमा असुविधा पुगेको संस्थाका प्रमुख शिवप्रसाद अमात्यले जानकारी दिए । पानी वितरण प्रभावित हुँदा तालचोक देखि वेगनासताल क्षेत्र र भण्डारढीक देखि गगनगौडा सम्मका उपभोक्तामा प्रत्यक्ष असर परेको उनको भनाइ छ ।

Advertisement


हरेक वर्ष वर्षादको समयमा आउने समस्यालाई दिर्घकालीन रुपमा समाधान गर्न प्रयास गरे पनि पनि विकासका नाममा खनिने बाटोघाटो र अन्य भौतीक निर्माणका कार्यले खानेपानी प्रभावित हुने गरेको संस्थाका अध्यक्ष मुरारी शर्माको भनाइ छ ।


‘पानी आउन रोकीए पछि दुईवटा सववोइल र आठ वटा बोरिङले उपभोक्ताको मागलाई पुर्ति गरिरहेका छौं, तर यतिले माग पुरा भएको छैन । केही जग्गा अधिकरण गरि थप पानीका पोखरी निर्माण गर्ने हाम्रो योजना छ ।’ उनले भने ।

Advertisement


लेखनाथमा करिव १६ हजार चार सय ५९ घरधुरीका करिव एक लाख भन्दा बढि उपभोक्ताहरु रहेका छन् ।

तपाईको प्रतिक्रिया