जोमसोम—मुस्ताङमा पनि १८ औं जातीय भेदभाव तथा छुवाछुत उन्मुलन दिवस मनाईएको छ ।जिल्ला प्रहरी कार्यालय मुस्ताङको आयोजनामा सोमबार बिहान यो दिवस जोमसोमको पुथाङ एअरपोर्टमा प्रभातफेरीसहित कोणसभा गरी मनाईएको हो ।
सबै प्रकारका जातीय विभेदको अन्त्य र जातीय छुवाछुतलाई बहिष्कार गरौं भन्ने नारासहित प्रहरी र प्रशासनको समन्वयमा विभिन्न सरोकारवाला निकायहरुले दिवसमा एक्येवद्धता जनाएका छन् ।

जातीय विभेद तथा छुवाछुत विरुद्ध लेखिएका व्यानर र प्लेकार्डसहित निस्किएको प्रभातफेरीमा प्रमुख जिल्ला अधिकारी जनकराज पन्त, डिएसपी भोजराज पाण्डेय,पुथाङ आमा समुहका महिला,पर्यटन व्यवसायी,यातायात व्यवसायी ,स्थानीय नागरिक र पत्रकार लगायतले उपस्थिती जनाएका थिए । दिवसका अवसरमा प्रहरीद्वारा जातीय भेदभाव तथा छुवाछुत विरुद्ध लेखिएका पर्चा÷पम्प्लेटहरु स्थानीय नागरिकहरुलाई वितरण गरिएको थियो ।

प्रभातफेरीपछि आयोजित कोणसभामा मुस्ताङका प्रजिअ जनकराज पन्तले समाज र सार्वजनिक सेवा प्रवाहमा देखिन विभेद र छुवाछुतका घटनालाई कानुनको पहुँचमा ल्याउनु पर्नेमा जोड दिए । प्रजिअ पन्तले हिमालमा भन्दा पहाड र तराईका क्षेत्रहरुमा यसप्रकारका घटनाहरु विकराल हुने गरेको उल्लेख गर्दै त्यस्ता विभेद र छुवाछुतका घटनालाई अन्त्य गर्न अझै जनचेतनाको खाँचो रहेको औल्याए ।

मुस्ताङका डिएसपी भोजराज पाण्डेयले राज्यले प्रत्याभुती गरिसकेको जातीय भेदभाव र छुवाछुतका घटनालाई सामाजिक रुपमा निरुत्साहित गर्दै लैजानु पर्नेमा जोड दिए । उनले जातीय,बर्गीय र तल्लो जातीको भनेर गरिने सबै खाले विभेद र छुवाछुतका घटनालाई कानुनको दायरामा ल्याउन प्रहरी निकाय कटिवद्ध रहेको उल्लेख गरे ।
कार्यक्रममा नेपाल पत्रकार महासंघ मुस्ताङ शाखाका अध्यक्ष सुन्दर कुमार थकाली र स्थानीय प्रियंका खड्काथोकी लगायतले जातीय भेदभाव तथा छुवाछुत उन्मूलन दिवसको शुभकामना दिएका थिए ।

०६२÷०६३ को जनआन्दोलनपछिको संसदले नेपाललाई २०६३ साल जेठ २१ मा जातीय भेदभाव तथा छुवाछुत मुक्त राष्ट्र घोषणा गरेको थियो । त्यसको ५ वर्षपछि २०६८ सालदेखि यसलाई दिवसको रुपमा मनाउन थालिएको हो ।