जोमसोम ।
राष्ट्रिय योजना आयोगका उपाध्यक्ष मीनबहादुर श्रेष्ठसहितको टोली आइतबार बेनी जोमसोम कोरला सडक अनुगमन गर्दै जोमसोम आइपुगेको छ ।ठुला आयोजनाको अनुगमन तथा सहजीकरण निर्देशिका २०८० को उपदफा ४ बमोजिम कालिगण्डकी करिडोर सडकको नतिजामूलक अनुगमन गर्न योजना आयोगका उपाध्यक्षसहितको टोली मुस्ताङ आएको हो ।

नतिजामूलक स्थलगत अनुमगन समितिले राष्ट्रिय गौरवको आयोजनामा देखिएका समस्या र चुनौती यकिन गरी ठोस कार्ययोजना निर्माण गर्ने उद्देश्यले योजना आयोगका उपाध्यक्षसहितको जम्बो टोली बेनी जोमसोम सडकको अनगुमन गर्दै जोमसोम आइपुगेको हो ।

तिब्बत र उपल्लो मुस्ताङसँग सीमाना जोडिएको कोरला नाकासम्मको सडक अनुगमनका लागि योजना आयोगका उपाध्यक्ष श्रेष्ठसहित प्रधानमन्त्री कार्यालय, अर्थ मन्त्रालय र भौतिक पूर्वाधार मन्त्रालयका सचिव, सहसचिव लगायत यहाँ आएका हुन् । कोरला सडक अनुगमनअघि जिल्ला प्रशासन कार्यालय म्याग्दीमा राष्ट्रिय गौरवको कोरला सडकको बिषयमा अन्तक्र्रिया गरिएको छ ।

मुस्ताङका प्रमुख जिल्ला अधिकारी जनकराज पन्तसहित म्याग्दी, बागलुङ र पर्वत जिल्लाका प्रमुख जिल्ला अधिकारीहरु कार्यक्रममा सहभागी थिए । मुस्ताङका प्रजिअ पन्तले कोरला सडकमा देखिएका बेथिति, ढिलासुस्ती र चुनौतीका बिषयमा राष्ट्रिय योजना आयोगको ध्यानार्कषण गराए ।

कोरला सडकका आयोजना प्रमुख धु्रव झाले कोरला सडकको अनुगमन हुने गरेको भए पनि अहिलेको स्थलगत अनुगमन नतिजामूलक परिणाम निकाल्ने गरी भएको दाबी गरे । सोमबार जोमसोमबाट कोरला नाकासम्मको सडक अनुगमन गर्ने तय छ ।

२०७३/०७४ देखि सुरु गरिएको बेनी जोमसोम कोरला सडकको पछिल्लो भौतिक प्रगति ८२ प्रतिशत र वित्तीय प्रगती ७८ प्रतिशत छ । आयोजना अन्तर्गत हालसम्म कोरला सडकमा ७ अर्ब ५ करोड ७ लाख ४८ हजार खर्च भइसकेको छ । आव २०८०/०८१ सम्म आयोजनालाई ८ अर्ब ३८ करोड बजेट विनियोजन भएको थियो ।