जोमसोम ।
मुस्ताङमा प्रहरीले अवैंध रुपमा ल्याइएको सल्लाको काठ बरामद गरेको छ । जिल्ला प्रहरी कार्यालय मुस्ताङबाट खटिएको प्रहरी टोलीले घरपझोङ—४ जोमसोमस्थित पक्की पुल नजिकबाट सोमबार दिउँसो ९६ क्युफिट अवैध काठ बरामद गरेको हो ।

अवैध काठ लिएर कागबेनीतर्फ जाँदै गरेको बाप्र०३—०११ च ०८५५ नम्बरको पिकअप गाडीलाई नियन्त्रणमा काठसहित नियन्त्रणमा लिएको मुस्ताङका प्रहरी नायब उपरीक्षक भोजराज पाण्डेयले जानकारी दिए । बरामद गरिएको अवैध काठको मूल्य अन्दाजी ५५ हजार रहेको प्रहरी नायब उपरीक्षक पाण्डेयले बताए ।

प्रहरीले अवैध काठ र जीपसहित चालक बाग्लुङ नगरपालिका वडा नम्बर ७ बस्ने ३१ वर्षीय भूमिराज विश्वकर्मालाई आवश्यक कारबाहीका लागि अन्नपूर्ण संरक्षण क्षेत्र आयोजना (एक्याप)को जोमसोम कार्यालयलाई जिम्मा लगाइएको प्रहरी नायब उपरीक्षक पाण्डेयले उल्लेख गरे ।

एक्याप कार्यालय प्रमुख प्रमोदराज रेग्मीले प्रहरीले बरामद गरेको अवैध काठ कार्यालयलाई प्राप्त भएको जानकारी दिए । उनले बरामद गरिएको अवैध काठ आवश्यक कारबाहीका लागि एक्यापको प्रधान कार्यालय पोखरामा पठाउने तयारी भइरहेको बताए ।

उनका अनुसार अनधिकृत तवरले वा खरिद गरी जिल्लाभित्र र बाहिर आयात निर्यात गरिने काठको सम्बन्धित निकायको छोडपुर्जी आवश्यक पर्ने उल्लेख गरे । बरामद गरिएको काठको छोडपुर्जी नभएकाले कारबाही प्रक्रिया अघि बढाइएको कार्यालय प्रमुख रेग्मीको भनाइ छ ।