लेखनाथ ।
पोखरा महानगरपालिका वडा नम्बर २८ वडा कार्यालयको आयोजनामा सम्पन्न भएको वडा स्तरीय हाजिरी जवाफ प्रतियोगितामा रत्नशोभा माध्यमिक विद्यालय प्रथम भएको छ ।

आधारभूत तहमा अध्ययन गर्ने विद्यार्थीहरु बिच सम्पन्न भएको हाजिरी जवाफ प्रतियोगितामा लेखनाथ आधारभूत विद्यालय द्वितीय, भुर्तेल आधारभूत विद्यालय तृतीय भए । सिद्ध आधारभूत विद्यालयले सान्त्वना पुरस्कार पायो ।

पोखरा २८ का वडा सदस्य एवं पोखरा महानगर शिक्षा परिषदका सदस्य डाल्डादेवी भुजेलले प्रथम, द्वितीय र तृतीय भएका विद्यालयका विद्यार्थीहरुलाई बधाइ दिइन् ।

जनज्योति माविका प्रधानाध्यापक रुद्रबहादुर थापा, लेखनाथ आधारभूत विद्यालयका शिक्षक सुनीता भुजेल लगायतले वडा स्तरीय हाजिरी जवाफ प्रतियोगिता अति महत्वपूर्ण कार्यक्रम भएको बताए ।

वडा सदस्य डाल्डा देवी भुजेलको अध्यक्षतामा प्रतियोगिता सम्पन्न भएको थियो । जनज्योति माध्यमिक विद्यालयका प्रधानाध्यापक रुद्रबहादुर थापाले कार्यक्रम सहजीकरण गरेका थिए ।