पोखरा ।
होटल संघ पोखरा नेपालले कास्कीका नवआगन्तुक प्रमुख जिल्ला अधिकारी भरतमणि पाण्डेलाई स्वागत र कास्की प्रहरी प्रमुख मोहनकुमार थापालाई सम्मान गरेको छ । हालै कास्कीमा सरुवा भई आएका प्रमुख जिल्ला अधिकारी पाण्डेलाई संघले स्वागत गरेको हो ।

जिल्लामा शान्ति, सुरक्षा कायम राख्दै विविध विकृति नियन्त्रणमा उल्लेख योगदान पुर्‍याएको भन्दै सोमबार थापालाई सम्मान गरिएको हो । २० वर्षअघि प्रहरी निरीक्षकबाट सेवा प्रवेश गरेका थापालाई गण्डकी प्रदेश सरकारले यसपालिको गणतन्त्र दिवसमा ‘शान्ति सुरक्षा तथा विपद् उद्धार प्रोत्साहन पुरस्कार’बाट सम्मान गरेको थियो ।

नेपाल प्रहरीमा थापा कानुन, अपराध अनुसन्धान र व्यवस्थापन विज्ञका रुपमा चिनिन्छन् । थापाले यसअघि २०७५ मा जनसेवाश्री चतुर्थ पाएका थिए भने २०७७ मा अख्तियार दुरुपयोग अनुसन्धान आयोग काठमाडौंमा कार्यरत रहँदा उत्कृष्ट कर्मचारीका रुपमा नगद २० हजारसहित सम्मानित भएका थिए ।

आयोजक संघका अध्यक्ष लक्ष्मण सुवेदीले थापाले पोखरा भित्रिंदै गरेका पर्यटकलाई गैरकानुनी रुपमा दुःख र हैरानी दिने गिरोहलाई निस्तेज पारेको जनाए । मोडिफाइ गरिएका बाइक नियन्त्रण, चुस्त शान्ति, सुरक्षाले पर्यटन क्षेत्रमा आशाको सञ्चार भएको उनको भनाइ छ । पोखरा र वरपरको होटल क्षेत्रमा मात्र पाँच खर्बभन्दा बढी लगानी भएको बताइन्छ ।

कार्यक्रममा प्रमुख जिल्ला अधिकारी पाण्डेले जिल्लाको समग्र सुरक्षा, उपभोक्ता अधिकारलाई समेत ख्याल गरी प्रहरी प्रशासन अगाडि बढ्ने प्रतिबद्धता गरे । प्रहरी उपरीक्षक थापाले विविध, विकृति विरुद्ध कास्की प्रहरीले अभियानलाई जारी राख्ने उल्लेख गरे । मोडिफाई गरिएका छ सय ८१ मोटरसाइकललाई कार्बाही गर्दा ५० लाख रुपैयाँ राजस्व संकलन भएको उनको भनाइ छ ।

कार्यक्रमका संघका सल्लाहकार र पदाधिकारीले पोखरा पर्यटकीय राजधानी घोषणासँगै रात्रिकालिन व्यवसाय २४ घण्टा खोल्न ४१ बुँदे आचारसंहिता पालना गराउनुपर्ने र अनुगमन समेत गर्नुपर्ने सुझाव दिए ।

कार्यक्रममा होटल संघ पोखरा नेपालका पूर्वअध्यक्ष भरतराज पराजुली, हान गण्डकी अध्यक्ष हरिप्रसाद शर्मा गैह्रे, संघका सल्लाहकारहरु बच्चुराम तिवारी, मेहरमान श्रेष्ठ, उपाध्यक्ष गणेशराज पहारी र कोषाध्यक्ष नेत्रप्रसाद पौडेल, महासचिव राजेन्द्र ढकाल लगायतले बोलेका थिए ।