पोखरा ।
गण्डकी प्रदेश स्तरीय टि–२० पुरुष क्रिकेट अन्तर्गत नवलपुर र स्याङ्जाले जित निकालेका छन् । पोखरा रंगशालास्थित क्रिकेट खेल मैदानमा जारी समूह ‘बी’ को खेलमा उनीहरुले जित निकालेका हुन् ।

नवलपुरले पर्वत विरुद्धको खेलमा ६ विकेटले जित हात पारेको छ । वर्षाका कारण ५ ओभर घटाइएको खेलमा टस जितेर पारीको सुरुवात गरेको पर्वतले ७ विकेट क्षतिमा ९३ रन बनायो । पर्वतका लागि रितिक थापाले २९ बलमा २ चौका र एक छक्का प्रहार गर्दै २९ रनको योगदान दिए भने अमृत गुरुङले १५ बलमा २ चौका र १ छक्काको मद्दतले २३ रन जोडे । पर्वतका दीपेन्द्र भण्डारीले १३, रोशन गौतमले ११ र सन्देश खड्काले १० रन जोडे ।

नवलपुरका लागि बलर ऋषी गोविन्द श्रेष्ठले ३ ओभरमा १९ रन दिएर ३ विकेट लिए भने कमल परियारले २, सुदीप अर्याल र स्वीकार श्रेष्ठले समान १ विकेट लिए । ९४ रन पछ्याएको नवलपुरले १३.४ ओभरमा ४ विकेट गुमाउँदै लक्ष्य भेट्टाएको थियो ।
खेलको म्यान अफ दि म्याचसमेत बनेका नवलपुरका प्रमिश अर्यालले ३६ बलमा ४ चौका प्रहार गर्दै ३४ रन जोडे ।

अर्का ओपनर गोविन्द विक भने शून्य रनमा पेभिलिएन फर्किए । उनी रन आउट भएका हुन् । रिजन काफ्लेले १६ बलमा २ चौकासहित २७ रनमा नटआउट रहे भने दीपक डुम्रेले १४ रनको योगदान दिए । पर्वतका रोशन गौतमले २ विकेट लिए भने विकाश क्षेत्रीले १ विकेट आफ्नो नाममा लेखाए ।

स्याङ्जाका किरणले लिए ५ विकेट
गोरखा विरुद्धको खेलमा स्याङ्जाका बलर किरण भट्टराईले ५ विकेट लिँदा स्याङ्जाले १० विकेटले सम्मानजनक जित दर्ता गरेको छ । टस जितेर ब्याटिङमा उत्रिएको गोरखा १८.१ ओभरमा सबै १० विकेट गुमाउँदै ७४ रनमा समेटियो । अतिरिक्त १३ रनसमेत पाएको गोरखाका गौरव पौडेलले ३५ रनको योगदानबाहेक अन्य खेलाडीले दोहोरो अंक छुन सकेनन् ।

स्याङ्जाका किरणले उत्कृष्ट बलिङ गर्दै ४ ओभरमा २ मेडनका साथ ७ रन दिएर ५ज नालाई आउट गरे । उनी खेलको म्यान अफ दि म्याचसमेत घोषित भए । त्यस्तै विपिनराज न्यौपानेले ३ं.१ ओभरमा ४ रन दिएर ३ विकेट लिए भने अंकित न्यौपाने र तुल्सी भण्डारीले समान १ विकेट लिए ।

जवाफी ब्याटिङमा उत्रिएको स्याङ्जाले विस्फोटक ब्याटिङ गर्दै ८.४ ओभरमा कुनै पनि विकेट नगुमाई ७५ रनको लक्ष्य भेट्टायो । स्याङ्जाका ओपनर खेलाडीद्वय ईश्वर क्षेत्री र करण पगेनीको जोडीले उत्कृष्ट ब्याटिङ गर्दै लक्ष्यमात्रै भेट्टाएनन्, टिमका लागि २ अंकसमेत जोडे । ईश्वरले २३ बलमा ३ चौका र ३ छक्काको मद्दतले ३६ रन बनाउँदा करणले २९ बलको सामना गर्दै ३ चौक र १ छक्का प्रहार गर्दै ३६ रनको योगदान दिए ।

मंगलबार पहिलो खेल पर्वत र स्याङ्जाबीच हुनेछ भने दोस्रो खेल पर्वत र नवलपुरले खेल्ने छन् । दशौं राष्ट्रिय खेलकुद प्रतियोगिताका लागि प्रारम्भिक टिम छनोटसमेत रहेको प्रतियोगितामा विजेता टिमलाई नगद पुरस्कार १ लाख र उपविजेता टिमलाई नगद ५० हजारका साथमा ट्रफी, मेडल तथा प्रमाणपत्र प्रदान गरिने गण्डकी प्रदेश क्रिकेट संघका अध्यक्ष सञ्जयकान्त सिग्देलले जानकारी दिए । महिलातर्फ हुने प्रतियोगिता असार ७ देखि १० गतेसम्म चल्नेछ ।