पोखरा ।
गण्डकी प्रदेशका पदमुक्त भएका सांसद फणिन्द्र देवकोटाले आफूमाथि कारबाही गर्ने निर्णय बदर गर्न माग गरिएको रिटमाथि सोमबार दोस्रो दिनको सुनुवाइ सुरू भएको छ ।

आइतबार सर्वोच्च अदालतका न्यायाधीश प्रकाशमान सिंह राउतको इजलासमा पेसी तोकिएको देवकोटाको मुद्दा बहसका लागि बाँकी रहेकाले हेर्दाहेर्दैमा राखेको थियो ।

रिटमा गण्डकी प्रदेशसभा सभामुख,गण्डकी प्रदेशसभा,माओवादी केन्द्र,माओवादी केन्द्र गण्डकी प्रदेसभाका संसदीय दलका नेता हरिबहादुर चुमान,निर्वाचन आयोग काठमाडौंलगायतलाई विपक्षी बनाइएको छ ।

माओवादी संसदीय दलले लगाएका ह्विप उल्लघन गर्दै जेठ २८ गते देवकोटाले मुख्यमन्त्री सुरेन्द्रराज पाण्डेको पक्षमा विश्वासको मत दिएका थिए । देवकोटा जेठ ३२ गते पदमुक्त भएका थिए । गोरखाबाट माओवादी केन्द्रको निर्वाचन चिन्हबाट निर्वाचित भएका हुन् ।

उनले आफूलाई माओवादीले कारबाही गर्न नमिल्ने भन्दै सांसदमा पुनर्बहालीको मागसहित सर्वोच्च गएका हुन् ।