पोखरा ।
सञ्चारिका समूह नेपाल गण्डकीले डिजिटल साक्षरता अभियान अन्तर्गत सूचना र प्रविधिमा महिलाको पहुँच विषयक तालिम आयोजना गरेको छ ।

मुख्यमन्त्री तथा मन्त्री परिषदको कार्यालय गण्डकीको सहयोगमा भएको तालिममा उपसभामुख विनाकुमारी थापाले महिलाको क्षमता अभिवृद्धि गर्न यस्ता तालिमले महत्वपूर्ण भूमिका खेल्ने बताइन् ।

उनले तालिममा सिकेका कुरा दैनिक व्यवहारमा लागू गर्न आग्रह गरिन् । आफू नीति निर्माण गर्ने तहमा रहेको बताउँदै उनले महिला पत्रकारको क्षमता बृद्धि गर्ने सवालमा सक्दो सहयोग गर्ने उनको भनाइ छ । उपसभामुख थापाले सञ्चार माध्यमबाट सही सूचना सम्प्रेषण हुनुपर्नेमा जोड दिइन् ।

प्रेस काउन्सिल नेपालकी सदस्य दुर्गा भण्डारीले सञ्चार माध्यमबाट प्रशारण हुने सूचना तथ्यपरक हुनुपर्ने बताइन् । पछिल्लो समय नयाँ नयाँ प्रविधिको विस्तार भइरहेको बताउँदै उनले प्रविधिको सदुपयोग गर्न सके समयको बचतसँगै गुणस्तरीय कार्यसम्पादन गर्न सकिनेमा उल्लेख गरिन् ।

फोटो पत्रकार प्रेम थापाले फोटो/भिडियो सुटिङ र सम्पादन सीप सिकाएका थिए । ४० जना तालिममा सहभागी थिए । सञ्चारिका समूहकी अध्यक्ष कविता श्रेष्ठको अध्यक्षतामा भएको कार्यक्रममा कोषाध्यक्ष उमा आलेमगरले पनि बोलेकी थिइन् ।