पोखरा ।
‘पर्यटन सबै मौसमका लागि’ भन्ने मूल नाराका साथ असार १५ गते शनिबार पोखरामा रोपाइँ महोत्सव हुँदैछ । अफ सिजनमा पर्यटकको आकर्षण बढाउन २०६१ सालदेखि रोपाइँ महोत्सव सुरु गरिएको थियो । यसपालिको महोत्सव १९ औं संस्करण हुनेछ ।

महोत्सवमा हिले दौड, हिले भलिबल, रस्साकस्सी, असारे गीत गायन, हल गौरु दौडलगायतका प्रतियोगिता गरिनेछ । समीक्षा अधिकारी, बालकाशी गुरुङ, निर्जला गुरुङ र प्रजापति पराजुलीको सांगीतिक प्रस्तुति पनि रहने पोखरा पर्यटन परिषद अध्यक्ष पोमनारायण श्रेष्ठले जानकारी दिए ।

पोखरा पर्यटन परिषदले जारी गरेको प्रेस विज्ञप्तिअनुसार पोखराको फेवा फाँटमा महोत्सव हुँदैछ । कार्यक्रम सफल बनाउन परिषदका अध्यक्ष पोमनारायण श्रेष्ठको संयोजकत्वमा ४५ सदस्यीय मूल आयोजक समिति गठन गरिएको छ ।

महोत्सवका स्थानीय आयोजकका रूपमा पोखरा महानगरपालिका–२३ मार्गी.बगर टोल विकास संस्था छन् । प्रवद्र्धकका रुपमा गण्डकी प्रदेश सरकार, नेपाल पर्यटन बोर्ड तथा पोखरा महानगरपालिका छन् ।

‘पोखराको बढ्दो सहरीकरण र स्थानीयको बदलिँदो जीवनशैलीले रोपाइँ महोत्सवले परम्परागत खेती प्रणालीलाई पुस्तान्तरण गर्न टेवा पु¥याएको छ,’ परिषदका महासचिव सञ्जयकान्त सिग्देल भन्छन्, ‘महोत्सवले पोखराको पर्यटन बढाउने उल्लेख्य भूमिका निर्वाह गरेको छ ।’

नेपालमा असार १५ गतेलाई राष्ट्रिय धान दिवसका रुपमा मनाइन्छ । पोखरामा हुने रोपाइँ महोत्सवमा विभिन्न कार्यक्रम आयोजना गरिनेछ । हिले दौड, हिले भलिबल, रस्साकस्सी, असारे गीत गायन, हल गौरु दौड प्रतियोगिता। साथै कार्यक्रममा चर्चित गायिकाहरू समीक्षा अधिकारी, बालकाशी गुरुङ र निर्जला गुरुङले सांगीतिक प्रस्तुति दिनेछन् । त्यसैगरी लोकगायक प्रजापति पराजुलीको पनि विशेष प्रस्तुति हुनेछ ।

रोपाइँ महोत्सव किन ?
—पोखरा तथा गण्डकी प्रदेशमा पर्यटन प्रवद्र्धनमा थप टेवा पुर्‍याउन ।
—‘पोखरा सबै मौसमका लागि’ भन्ने भनाइलाई सार्थक बनाउँदै रोपाइँजात्रामा पर्यटक तथा युवालाई सहभागी गराएर संरक्षणका भाव जगाउन ।
—पोखरामा भएका पर्यटकलाई नेपालको परम्परागत कृषि प्रणाली तथा महत्वपूर्ण जात्राको प्रत्यक्ष अनुभूति गराउन । ।
—पोखरा सुरक्षित गन्तव्य रहेको सन्देश दिन ।
—कृषकहरूलाई आफ्नो पेसाप्रति गौरब बोध गराउन ।
—नयाँ पुस्तालाई चामल बोरामा होइन, खेतमा फल्छ फल्छ भन्ने सिकाइसँगै परम्परागत कृषि प्रणालीको प्रत्यक्ष जानकारी गराउन ।