पोखरा ।

सांसद फणीन्द्र देवकोटालाई गण्डकी प्रदेश सभामा प्रवेश गर्न रोक लगाइएको छ । प्रदेश सभाका मर्यादा पालकले बिहीबार प्रदेशसभा बैठकमा भाग लिन जान नदिई बाहिरै रोकेको सांसद देवकोटाले बताए । जेठ २८ गते मुख्यमन्त्री सुरेन्द्रराज पाण्डेलाई देवकोटाले विश्वासको मत दिएका थिए । माओवादीले उनलाई ह्वीप उल्लंघन गरेको भन्दै जेठ ३२ गते निलम्बन गरेको थियो ।

देवकोटाले सर्वोच्च अदालतमा माओवादीको कारबाहीविरुद्ध असार ६ रिट दायर गरेका थिए । सर्वोच्चले सोमबार गण्डकी प्रदेश सभा सदस्यका रूपमा काम गर्न दिन अन्तरिम आदेश दिएको थियो । सर्वोच्चको पत्र बोकेर प्रदेश सभा आइपुगेका देवकोटालाई प्रदेश सभा भवनमा जान रोक लगाइएको हो ।

‘सर्वोच्चबाट जे फैसला भयो । त्यो पत्र हिजो संसद सचिवालयमा दर्ता भएको छ । हिजो पत्र दर्ता भएपछि आज प्रदेश सभा भवनमा भाग लिन पुगेको थिए । तर, प्रवेश गर्न दिइएन, कति पर्खनु भनेर थकाइ लागेर फर्के,’ देवकोटाले समाधानसँग कुरा गर्दै भने ।