पोखरा ।
पोखरा महानगरपालिकाले कृषकलाई १४ हजार पाँच सय ५० फलफूलका बिरुवा वितरण गरेको छ । महानगरपालिकाले ५० प्रतिशत अनुदानमा विभिन्न जातका फलफूलका बिरुवा वितरण गरेको कृषि महाशाखा प्रमुख मनोहर कडरियाले जानकारी दिए ।

४ सय ७८ कृषक तथा कृषक समूहलाई बिरुवा वितरण गरिएको हो । महानगरपालिकाले एक÷एक हजार संख्यामा आँप, लिची, एबोकाडोका बिरुवा वितरण गरेको छ ।

कागतीका १ हजार ५ सय बिजु र ४ हजार कलमी बिरुवा तथा सुन्तलाका १ हजार ५ सय बिजु र तीन हजार कलमी बिरुवा वितरण गरिएको छ । यस्तै, एक हजार ५० अम्बा र पाँच सय मेकाडामिया नटका रिुवा वितरण गरिएको कडरियाले जानकारी दिए ।

कृषकलाई ५० प्रतिशत अनुदानमा प्रतिबिरुवा आँँप ५०, लिची ४०, अम्बा २५, कागती बिजु ३०, कलमी ६०, सुन्तला बिजु ३०, कलमी ६०, मेकाडामिया नट ५०, एबोकाडो ५० मा उपलब्ध गराइएको हो ।

वितरण गरिएका फलफूलका बिरुवाको तीन गुणा बढी माग भए पनि सीमित साधन, स्रोतका कारण माग बमोजिम उपलब्ध गराउन नसकिएको महानगरले जनाएको छ ।