पोखरा ।
गुणस्तरीय होटल सम्बन्धी कुकिङ तालिमलाई लक्ष्य गरी पर्यटन राजधानी पोखराको सिर्जनाचोकमा ४ वर्ष अघिदेखि सञ्चालनमा आएको आरके हस्पिटालिटी ह्युमन रिसोर्स म्यानेजमेन्ट प्रालिले अन्तर्राष्ट्रियस्तरकोे किचन ल्याब सञ्चालनमा ल्याएको छ ।

कुकिङ तालिमको प्रभावकारिता अभिवृद्धि गर्दै स्वदेश एवं विदेशमा दक्ष जनशक्ति तयार गर्ने लक्ष्यका साथ संस्थाले अन्तर्राष्ट्रियस्तरको किचन ल्याब सञ्चालनमा ल्याएको हो । किचन ल्याबको एक कार्यक्रमका बीच आइतबार होटेल संघ पोखराका अध्यक्ष लक्ष्मण सुवेदी, बाराही ग्रुपका कर्पोरेट म्यानेजर राजकुमार केसी लगायतले उद्घाटन गरे । कार्यक्रममा होटेल संघ पोखराका अध्यक्ष लक्ष्मण सुवेदीले पर्यटन राजधानी पोखरामा दक्ष जनशक्तिका लागि पर्याप्त अवसरहरू रहेको बताए । बाराही ग्रुपका कर्पोरेट डाइरेक्टर राजकुमार केसीले कुकिङ तालिम प्राप्त गरेका दक्ष जनशक्तिको भविष्य उज्वल रहेको सुनाए ।

होटेल संघ पोखराका पूर्व अध्यक्ष विकल तुलाचनले आर.के.हस्पिटालिटीले बजारको माग अनुसारको सिकाई गरिरहेको बताउँदै विद्यार्थीहरूले आफ्नो सिकाइलाई लगाबका साथ अघि बढाउनुपर्नेमा जोड दिए । आरके हस्टिालिटी ह्युमन रिसोर्स म्यानेजमेन्ट प्रालिका सञ्चालक तथा प्रशिक्षक आरके लामाले देश तथा विदेशका सामान्य होटल लगायत ५ तारे होटेलहरूमा रोजगारका लागि योग्य बनाउने तथा सतप्रतिशत रोजगारीको सुनिश्चितता गर्दै आएको संस्थाले देशैभरका विद्यार्थी तथा अभिभावकको मन जित्न सफल बनेको बताए ।

२४ वर्षदेखि होटल र हस्पिटालिटीका क्षेत्रमा काम गरेको आफ्नो अनुुभव सुनाउँदै उनले साढे २० वर्ष त होटेल क्षेत्रमा नै काम गरी यस क्षेत्रमा केही गर्नुपर्छ भन्ने सोचका साथ ४ वर्ष यता आरके हस्पिटालिटी ह्युमन रिसोर्स म्यानेजमेन्ट प्रालि सञ्चालनमा ल्याएको जनाए । संस्थाबाट हालसम्म करिब १५ हजार जनशक्ति उत्पादन भइसकेको उल्लेख गर्दै उनले उत्पादित जनशक्ति कोही पनि बेरोजगार नरहेको सुनाए ।

सिटिइभिटिबाट मान्यताप्राप्त संस्थाले ३ महिनादेखि १० महिना समयावधिका विभिन्न किसिमका तालिम सञ्चालन गर्दै आएको उनको भनाइ थियो । ‘हामीले विश्व बजारमा फस्टाउँदै गएको होटेल तथा रेस्टुरेन्टलाई दृष्टिगत गरी विद्यार्थीहरूलाई कन्टिनेन्टल, इटालियन, चाइनिज, फ्रेन्च, इन्डियन बेकरी तथा पेस्ट्री खानाका परिकारहरूलाई समावेश गरी अलराउन्डर कुकिङमा विद्यार्थीहरूलाई दक्ष बनाउँदै आएका छौं,’ भने, ‘कुकिङ एउटा साधारण सिपमात्र होइन, यो एउटा मूल्यवान कला पनि हो । राम्रो कुक र सेफ बन्नका लागि समय, धैर्य, लगनशीलता, मेहेनतका साथै कुशल प्रशिक्षकको आवश्यकता पर्दछ ।’ कार्यक्रममा सिनियर सेफ उमेश भुवाइँ लगायतले बधाइ तथा शुुभकामना व्यक्त गरेका थिए ।