पोखरा ।

मिस्टर नेपालको गण्डकी प्रदेश अडिसन २९ लेकसाइड स्थित होटेल बाराहीमा हुने भएको छ। १८ वर्षदेखि ३२ वर्षसम्मका ५ फिट ७ इन्च माथि उचाई भएका नेपाली नागरिकले प्रतियोगितामा सहभागिता जनाउन सक्नेछन् ।

प्रतियोगिताको आवेदन ई–सेवा तथा अडिसनमै वा सामाजिक सञ्जालबाट समेत प्राप्त गर्न सकिनेछ । अडिसनमा पोखरा लगाएत स्याङजा, तनहुँ, गोर्खा, बागलुङबाट सहभागी हुने मिस्टर नेपालको गण्डकी प्रदेश निर्देशक आशिष पुरीले जानकारी दिए ।

उनका अनुसार पोखरा अडिसनबाट ५ देखि १० जना छनौट गरिनेछ । देशभरका अडिसनबाट छनौट भएकाहरुबीच काठमाडौंमा हुने अडिसनबाट २५ जना छनौट हुनेछन् । उनीहरुलाई एक महिनाको प्रशिक्षण दिइनेछ ।

काठमाडौंको याक एण्ड यतिमा ग्राण्ड फिनाले हुने पुरीले बताए । विजेताले पाँच लाख बराबरको पुरस्कार प्राप्त गर्नेछन् । नेपालगंज, बुटवल, चितवन, हेटौडा, जनकपुर,दमक र विराटनगरमा अडिसन भइसकेको छ।

मिस्टर नेपालले मिस्टर वर्ल्डमा सहभागी हुने अवसर प्राप्त गर्नेछन् भने फर्स्ट रनरअपले मिस्टर ग्लोबल तथा सेकेन्ड रनरअपले मिस्टर टुरिजममा सहभागी हुने अवसर प्राप्त गर्नेछन् । मिस्टर नेपाल सन् २००२ देखि आयोजना हुँदै आएको छ ।