पोखरा ।
पोखरा महानगरपालिका वडा नं १९ तल्लाकोट टारीमा पहिरोमा परी परिवारका चार सदस्य गुमाएका पवन परियारलाई राहत प्रदान गरिएको छ । गएको २७ गते राति आएको पहिरोमा परी पहिरोले घर पुरिँदा मृत्यु भएका कुलबहादुर परियार, उनकी श्रीमती मनकुमारी र छोरीहरु लक्षिमा परियार, प्रशनाको मृत्यु भएको थियो ।

परिवारलाई टारीमै पुगी कास्कीका प्रमुख जिल्ला अधिकारी भरतमणि पाण्डे नेतृत्वको जिल्ला सुरक्षा समितिका पदाधिकारी सहितको टोलीले ७ लाख प्रदान गरेको हो । नेपाल सरकारको जिल्ला विपद् व्यवस्थापन कोषबाट ५ लाख र गण्डकी प्रदेश सरकारको तर्फबाट २ लाख गरी जम्मा ७ लाख राहत हस्तान्तरण गरिएको हो ।

प्रमुख जिल्ला अधिकारी पाण्डेले घटनामा नाबालक पवनबाहेक परिवारका सबै सदस्यको निधन भएकाले राहत रकम दुरुपयोग हुन नदिने व्यवस्था मिलाउन स्थानीय तहलाई निर्देशन दिए । पहिरोमा परी घर पूर्ण रुपमा क्षति भएकाले आवास पुननिर्माण प्रक्रिया थाल्न पनि उनको अनुरोध छ ।

सोही घटनामा मृत्यु भएका प्रभा परियार र अस्मित परियारका परिवारलाई आवश्यक कागजातसहित नजिकको हकदार सम्पर्कमा आएपश्चात तत्काल राहत रकम उपलब्ध गराइने प्रमुख जिल्ला अधिकारी पाण्डेले बताए । घटनामा वैदेशिक रोजगारीमा रहेकी मुना परिवार र घरै रहेकाक छोरा पवनबाहेक सबैको निधन भएको छ ।