पोखरा । लायन्स क्लब अन्तर्राष्ट्रिय डिष्ट्रिक ३२५ जे नेपालले तनहुँ जिल्लाको शुक्लागण्डकी नगरपालिका– ७ काउरेमा पहिरोमा घर पुरिँदा ज्यान गुमाएका व्यक्तिका परिवारलाई सहयोग प्रदान गरेको छ ।    
    
गत असार २२ गते गएको पहिरोमा परेर ज्यान गुमाएका श्याम भण्डारी, अनिषा बाँस्तोला र हिरा नेपालीको परिवारलाई प्रतिपरिवार २५ हजारका दरले आर्थिक सहयोग प्रदान गरिएको डिस्ट्रिक गभर्नर मिलन थापाले जानकारी दिइन् । उनीसहितको टोलीले मृतकका परिवारजनसँग भेटगरी रकम हस्तान्तरण गरेको हो ।    
    
‘जहाँ दुःख, जहाँ आवश्यकता त्यहाँ लायन्स’भन्ने मूल मन्त्रअनुसार दुःखमा रहेका तीन जना मृतकका परिवारलाई राहतस्वरूप सहयोग गरिएको थापाले बताइन् । उनले मृतक बाँस्तोलाका छोराको उच्च शिक्षाका लागि आफ्नोतर्फबाट सहयोग गर्ने प्रतिबद्धतासमेत व्यक्त गरिन् ।

    
सहयोग हस्तान्तरण कार्यक्रममा पूर्वडिस्ट्रिक गभर्नर ध्रुव थापा, असिस्टेन्ट चिफ एड्भाइजर सन्तोष घिमिरे, एरिया चिफ सूर्य बराल, डिजास्टर चिफ उर्मिला श्रेष्ठ, शुक्लागण्डकी नगरपालिका–७ का वडाध्यक्ष खड्कसिंह थापालगायतको उपस्थिति थियो ।    
    
 असार २२ गते शनिबार दिउँसो ३ः१५ बजे शुक्लागण्डकी–७ काउरेमा हिरा नेपाली र सुनमाया कुमालको घरमा पहिरो खसेको थियो । पहिरो खसेपछि सामान निकाल्न जाने क्रममा तीनजना बेपत्ता भएका थिए । बेपत्ता भएका एक जनाको सोही दिन र थप दुई जनाको शव भोलिपल्ट बिहान भेटिएको थियो ।