जोमसोम ।
बाढीले सडक ट्रयाक बगाएपछि मुस्ताङ डोल्पा सडक अवरुद्ध भएको छ । मंगलबार साँझसाङ्ता गाउँ नजिकैको ठाँडो खोलामा आएको बाढीले सडकमा क्षति गरेपछि मुस्ताङ डोल्पा सडक पूर्ण रुपमा बन्द भएको हो ।

सडक अवरुद्ध भएको स्थान मुस्ताङको वारागुङ मुक्तिक्षेत्र ५ साङ्ता गाउँदेखि करिब ५ सय पश्चिमतर्फ पर्छ । सडकदेखि माथि पूर्वतर्फको ठाँडो खोलाको उच्च बहावले करिब १ सय ५० मिटर सडक कटान गरेको वारागुङ मुक्तिक्षेत्र ५ का वडाध्यक्ष सुरेन्द्र गुरुङले जानकारी दिए । बाढीले साबिक सडकको ट्याक ध्वंस्त भएको र करिब ५० मिटर बाटोमा गहिरो गल्छी बनेको वडाध्यक्ष गुरुङको भनाइ छ ।

साङ्ता गाउँ नजिकैको ठाँडो खोलाले मुस्ताङ—डोल्पा सडक अवरुद्ध भएकाले अब उपल्लो डोल्पामा तत्काल खाद्यान्न तथा अन्य दैनिक अत्यावश्यकीय मालसामान ढुवानीमा समस्या पर्ने वडाध्यक्ष गुरुङले उल्लेख गरे । उपल्लो डोल्पा स्थित छार्का ताङसिङका बासिन्दाले खाद्यान्न तथा दैनिक उपभोग्य सामान ढुवानी गर्न सबैभन्दा छोटो सडक यही हो ।

वडाध्यक्ष गुरुङले मुस्ताङ डोल्पा सडक ट्याक जोडिएपछि मुस्ताङबाट उपल्लो डोल्पासम्म ट्याक्टर र जिपबाट मालसामान ढुवानी हुने गरेको उल्लेख गरे । बाढीले सडक ट्याक क्षति भएको र अब मौसम अनुकूल भएपछि सडक मर्मतको काम सुरु गर्ने वडाध्यक्ष गुरुङको भनाइ छ ।

संघीय सरकारको भौतिक पूर्वाधार मन्त्रालय अन्तर्गत डिभिजन सडक कार्यालय बागलुङले मुस्ताङ र डोल्पा जोड्ने रणनीतिक महŒवको सडकलाई चरणवद्ध रुपमा निर्माणका लागि बजेट विनियोजन गरेको थियो । आर्थिक वर्ष २०७५/०७६ देखि मुस्ताङको पाक्लिङदेखि मुस्ताङ, डोल्पासम्म आधा दर्जन प्याकेजमा विभिन्न निर्माण कम्पनीले सडक निर्माण गरेका थिए ।

गत वर्षमात्रै मुस्ताङको साङ्ता गाउँदेखि केही परबाट चट्टान काटेर सीमा क्षेत्रसम्म करिब २० किलोमिटर सडक विस्तार गरिएको थियो । उपल्लो डोल्पाको छार्का ताङसिङ गाउँपालिकाले पनि आफ्नो क्षेत्रबाट सडक स्तरोन्नति गर्दै सीमा क्षेत्रमा सडक निर्माण गरेको छ ।

यसअघि सडक ट्याक नहुँदा उपल्लो डोल्पाबासीले घोडा, खच्चडमा भारी बोकाएर जोमसोमबाट उपल्लो डोल्पासम्म मालसामान ढुवानी गर्ने गथ्र्ये । उपल्लो डोल्पाबासीलाई जोमसोम, पोखरा र काठमाडौ आवतजावत गर्नसमेत यो बाटो छोटो र सहज छ ।