वालिङ । नेपाली कांग्रेसका केन्द्रीय उपसभापति धनराज गुरुङले आज स्याङ्जाका पहिरो प्रभावित क्षेत्रहरुको निरीक्षण गरेका छन् ।

गत असार २१ देखि २३ गतेसम्मको अविरल वर्षाका कारण बाढीपहिरोले क्षति पुर्‍याएका भिरकोट, वालिङ र गल्याङ नगरपालिकाका विभिन्न बस्तीको निरीक्षण गरेका हुन् । विशेषगरी पहिरोले पुरिएर ज्यान गुमाएका परिवार र विस्थापित परिवारलाई उनले व्यक्तिगत रुपमा जनही १० हजार सहयोग उपलब्ध गराए ।

ण्पूर्वमन्त्रीसमेत रहेका गुरुङले भीरकोट नगरपालिका–५ ज्यामिरेमा गत असार २२ गते पहिरोमा पुरिएर ज्यान गुमाएएकी ७४ वर्षीया ख्यामकुमारी मल्लको परिवारलाई १० हजार उपलब्ध गराएका हुन् ।

भिरकोट–६ को फोक्सिङमा पहिरोले विस्थापित भएका भक्तबहादुर थापाको परिवारलाई पनि उनले नगद १० हजार उपलब्ध गराए । “नागरिकहरु दुःखमा परेका बेला यहाँको जनप्रतिनिधि भएको नाताले व्यक्तिगत रुपमा जे सकेँ त्यो सहयोग गरेँ”, उनले भने “जनधन क्षति भएकालाई क्षतिपूर्तिको व्यवस्था र आवास निर्माणका लागि आवश्यक पहल गर्नेछु ।”
भिरकोट–५ को ज्यामिरे र ६ को फोक्सिङमा पहिरोका कारण आठ घर जोखिममा छन् । रासस