निराश नेपालीमा आशाको सञ्चार गर्दै भएको वसन्त विद्रोहले गणतन्त्र स्थापना गर्‍यो । नयाँ संविधानसँगै संघीयतामा मुलुक गयो । संघीयताको सबैभन्दा मौलिक कुरा नै प्रदेश सरकारहरु हुन्, अधिकार सम्पन्न स्थानीय तहहरु हुन् । त्यसरी बनेका प्रदेश सरकारहरुले स्थापनाको सात वर्ष भइसक्दा पनि जनतालाई आफ्नो औचित्य बुझाउन सकेका छैनन् । प्रदेश सरकार देशको विकासको ऐजेरुको भन्ने मान्यता बलियो बन्दै गएको छ ।

त्यसरी बनेको प्रदेश सरकारको व्यवस्थापिका गण्डकीमा भने पुरानो पञ्चायतको भवनमा चलिरहेको छ । बेला बेलामा मर्मतसंहार गरिए पनि त्यो सदनका लागि उपयुक्त बन्नै सकेको छैन । ढुंगाले छाएको करिब पाँच दशक पुरानो भवनबाट चलिरहेको प्रदेशसभालाई नयाँ भवनबाट चलाउने योजना बनेको धेरै भइसक्यो । यसपालि भने प्रदेशसभाको भवन निर्माणका लागि टेन्डर आह्वान गर्ने तयारी भएको छ । सहरी विकास तथा भवन निर्माण कार्यालय कास्कीले बनाएको विस्तृत परियोजना प्रतिवेदन (डिपिआर) बमोजिम करिब ४५ करोडमा नयाँ भवन बनाउन लागिएको हो ।

अब बन्ने भवन आधुनिक खालको हुनेछ । भवनको भुइँ तला १ हजार ८ सय ४६ वर्गमिटर, पहिलो तला १ हजार ४ सय ९६ र दोस्रो तला ७ सय ३९ वर्गमिटरका हुने छन् । स्रोत सुनिश्चिततापछि साउनभित्रै बोलपत्र आह्वान गर्ने तयारी छ । प्रदेशसभाको दोस्रो कार्यकालभित्रै भवन निर्माण पूरा गर्ने लक्ष्य लिइएको छ । यो लक्ष्य असम्भव त छैन तर नेपालीको काम गर्ने शैलीले त्यसो हुनेमा शंका गर्ने प्रशस्तै ठाउँ छन् । यो आर्थिक वर्षमा भवन निर्माणका लागि ९ करोड विनियोजन भएको छ । डिपिआर निर्माण गर्ने कम्पनी स्केल आर्किटेक्टले भवनको आकर्षक डिजाइन पनि तयार गरिसकेको छ ।

नयाँ प्रदेशसभा भवनको भुइँ तलामा सभामुख, प्रदेशसभा सचिवालय, उपसभामुख, विषयगत समितिका सभापति र समितिका कार्यालय लगायतका रहने छन् । भवनको पहिलो तलामा सय जना जति अट्ने हल बन्नेछ । ६० सदस्यीय प्रदेशसभाका लागि सय जना जति क्षमताको हल बनाइनेछ । अहिले दर्शकदीर्घाका लागि सीमित ठाउँमात्र उपलब्ध छ । दोस्रो तलामा प्रदेशसभा बैठक हेर्न चाहने पत्रकार, राजनीतिकर्मी र सर्वसाधारणका लागि स्थान बनाइने भएको छ । सोही तलामा पत्रकार सम्मेलन, साना औपचारिक कार्यक्रम गर्न मिल्ने खालको सानो हलसमेत बनाइनेछ ।

यसअघि बनाइएको डिपिआरमा १ अर्ब ४६ करोड लागतमा प्रदेशसभा भवन बनाउने योजना थियो । प्रदेशको सामथ्र्यले त्यस्तो भवन सम्भव थिएन । बारम्बार सरकार परिवर्तन हुँदा योजनाहरु परिवर्तन हुने, काम प्रभावित हुने गरेको देखिएकै छ । गण्डकीले संघमा सरकार परिवर्तनको मार निर्मम रुपमा भोगेको छ । जोसुकै नेतृत्वको सरकार आए पनि गण्डकी प्रदेशसभा भवन बनाउनैपर्छ । आकर्षक र आधुनिक प्रदेशसभा निर्माणसँगै जनतालाई परिवर्तनको अनुभूति दिने गरी प्रदेशसभा सदस्यको भूमिका जनताले अपेक्षा गरेका छन् ।