पोखरा । पोखरा महानगरका इन्जिनियर संलग्न घुस प्रकरणमा अदालतमा बयान फेर्ने २ जनाविरुद्ध वयान फेरेको आरोपमा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । अख्तियारले शुक्रबार पोखराका केशरीप्रसाद तिवारी र उर्मिला पौडेलमाथि बयान फेरेको आरोपमा मुद्दा दायर गरेको हो ।

रंगेहात घुससहित प्रक्राउ परेका भनिएका विरुद्ध परेको मुद्दामा अदालतमा साक्षीका रुपमा पेश गरिएका उनीहरुले बयान फेरेपछि अख्तियारले मुद्दा चलाएको हो । अख्तियार पोखराको टोलीले वैशाख २० मा पोखरा महानगरपालिकाका नक्सा शाखामा कार्यरत सब–इञ्जिनियर उषाकिरण रोकाया, इञ्जिनियर शिवप्रसाद बराल र गोदार कन्सल्टेन्सीका सुरज कुँवरविरुद्ध मुद्दा दायर गरेको थियो ।

रोकाया र कुँवरलाई सेवाग्राहीसँग रकम लिँदै गर्दा अख्तियार दुरुपयोग अनुसन्धान आयोगको गण्डकी प्रदेश कार्यालय पोखराबाट खटिएको टोलीले चैत २८ गते पक्राउ गरेको थियो । अनुसन्धानका आधारमा संलग्नता देखिएको भन्दै इन्जिनियर बराललाई पनि वैशाख ४ गते पक्राउ गरिएको थियो ।

त्यही घटनामा संलग्न २ जना केशवप्रसाद तिवारी र उर्मिला पौडेललाई मुद्दा नचलाई सरकारी साक्षीको रुपमा अदालतमा पेश गरेको थियो । तर विशेष अदालतमा उपस्थित भएका उनीहरुले उल्टो बकपत्र गरेको भनी उनीहरुमाथि समेत मुद्दा चलाएको हो ।

सरकारी साक्षीले उल्टो बकपत्र गरेमा वा अख्तियारको प्रतिकुलमा बकपत्र गरेमा उसलाई दिएको सजाय छुटको मागदाबी उल्ट्याएर मुद्दा चलाउने चलन छ ।