पोखरा
ग्रिन गभर्नेन्स नेपालको आयोजना एवं युएसएआइडीको सहयोगमा शनिबार पोखराको पचभैयामा आयोजित कार्यक्रममा बाँदरका कारण बढ्दो समस्या र समाधानबारे छलफल गरिएको छ ।

सिड फाउन्डेसन नेपालको स्थानीय संयोजनमा गरिएको कार्यक्रममा वक्ताहरूले बाँदरको समस्याका कारण गाउँ बस्तीमा खेतीपाती लगाउने क्रम घट्दै गएको बताए । ग्रिन गभर्नेन्स नेपालका कार्यक्रम अधिकृत अर्जुन भुषालले देशव्यापी रुपमा बाँदरको समस्या रहेको बताउँदै यसको विकल्पमा विभिन्न खेती गर्न सकिने सुनाए ।

संस्थाले मानव वन्यजन्तु नियन्त्रणमा नवप्रवर्तन कार्यक्रम अन्तर्गत आवाजका माध्यमबाट बाँदरलाई धपाउने जस्ता विभिन्न विकल्पबारे अध्ययन गरिरहेको जानकारी दिए । बाँदर प्रकोपको विकल्पमा कागती, खुर्सानी, अदुवा जस्ता विभिन्न वैकल्पिक खेती गर्न सकिने उनको भनाइ छ ।

बन्यजन्तुुबाट भएको क्षतिको राहत वितरण निर्देशिका २०८० लगायतका कानुनी व्यवस्थाबारे समेत उनले प्रकाश पारे । सिड फाउन्डेसन नेपालका निर्देशक दामोदरभक्त थापाले बाँदरको प्रकोप कम गर्नका लागि उनीहरूले खाने फलफूलका बोटसहित बाँदर बगैंचाको अवधारणा अघि सार्नुपर्नेमा जोड दिए ।

मादी गाउँपालिका वडा नं १२ लिपेपानीका गिरेन्द्र गुरुङले बाँदर तर्साउने बन्दुकबारे जानकारी दिए । लेखनाथ पत्रकार मञ्चका अध्यक्ष कविराज खनालले बाँदरले खेतीमा पार्ने गरेको असरबाट जोगिन कुरिलो, सिप्लीकान खेती जस्ता विभिन्न विकल्प अपनाउने सकिने सुझाव दिए ।