पोखरा । पोखराको बागलुङ बसपार्क आसपासमा आफूलाई सादा पोसाकका प्रहरी भनेर सर्वसाधारणलाई धम्क्याउने र रकम समेत असुल गर्ने २ जनालाई प्रहरीले पक्राउ गरेको छ ।

वडा प्रहरी कार्यालय बगरको टोलीले पोखरा महानगरपालिका वडा नं.१७ छोरेपाटन बस्ने वर्ष ३२ को सन्दिप श्रेष्ठ र ऐ. वडा नं. ७ माछापुच्छ्रे टोल बस्ने वर्ष २६ का सरोज थापालाई  पक्राउ गरेको हो ।

सर्वसाधारण नागरिकहरुलाई दुख हैरानी दिई शरीरको तलासी लिई चेकजाँच समेत गर्ने, पैसा असुल गर्ने तथा कानुनी दायरामा ल्याउने भनि डर त्रास देखाई अभद्र व्यवहार गरेको भन्ने सूचना पाएपछि प्रहरीले अनुसन्धान थालेको थियो।

प्रारम्भिक सोधपुछ गर्ने क्रममा प्रहरी कर्मचारीहरु माथि समेत अभद्र व्यवहार गरेकोले उनीहरुलाई नियन्त्रणमा लिई जिल्ला प्रशासन कार्यालय कास्कीबाट सार्वजनिक, हित, स्वास्थय, सुरक्षा, सुविधा र नैतिकता विरुद्दको कसूर अन्तर्गत अभद्र व्यवहार मुद्दामा दश (१०) दिन म्याद थप गरी अनुसन्धान प्रकृया अगाडि बढाइएको प्रहरी नायव उपरीक्षक वसन्तकुमार शर्माले जानकारी दिए ।