पोखरा ।
पोखरामा अवैध लागु औषध सहित मंगलबार छुट्टाछुट्टै ठाउँबाट २ जना पक्राउ परेका छन् । जिल्ला प्रहरी कार्यालय कास्की र लागू औषध नियन्त्रण व्युरो शाखा पोखराबाट खटिएको प्रहरी टोलिले उनीहरुलाई पक्राउ गरेको हो ।

पोखरा बस्दै आएका खोटाङका वर्ष ४० का बिरबहादुर तामाङ पोखरा ८ सिमलचौरबाट र भारतका वर्ष ४६ का शिवकुमार बानियाँ पोखरा १२ भृकुटी टाेलबाट पक्राउ परेको कास्की प्रहरीले जानकारी दिएको छ ।

तामाङलाई बुप्रिनर्फिन ५ एम्पुल, डाईजापाम ५ एम्पुल र फेनरागन ५ एम्पुल गरी जम्मा १५ एम्पुल र नाईट्रोभ्याट १० लेखेको ट्याव्लेट २० चक्की सहित पक्राउ गरिएको छ ।

बानियाँको साथबाट बुप्रिनर्फिन ३५३ एम्पुल, डाईजापाम ३५९ एम्पुल र फेनरागन ३४५ एम्पुल गरी जम्मा १०५७ एम्पुल र नाईट्रोभ्याट –१० लेखेको ट्याव्लेट १०७० चक्की र नुर्फिन लेखेको स्टिकर १७४ थान, मोबाइल थान १ फेला परेको प्रहरीको भनाइ छ ।

कास्की जिल्ला अदालतबाट लागू औषध सम्बन्धी मुद्दामा दिन सात (७) म्याद थप गरी अनुसन्धान प्रकृया अगाडी बढाइएको प्रहरीले जनाएको छ ।