पोखरा । लागुऔषध किनबेचमा संलग्न फार्मेसी सञ्चालकसहित दुई जनालाई प्रहरीले पक्राउ गरेको छ । पक्राउ पर्नेमा धादिङको निलकण्ठ नगरपालिका–९ का २७ वर्षीय विजय पोख्रेल र पोखरा–९ नयाँबजारका ४८ वर्षका केदार अधिकारी छन् । अधिकारी लागुऔषध बिक्रेता र पोख्रेल क्रेता हुन ।

कास्की प्रहरीका अनुसार वडा प्रहरी कार्यालय बैदामको टोलीले बुधबार साँझ ८ बजेको समयमा नयाँबजारमा शंकास्पद अवस्थामा पोख्रेललाई फेला पारी निजको शरीर खानतलासी गर्दा उनको झोलामा ट्यापेन्टाडोल हाइड्रोक्लोराइड क्याप्सुल १ सय २० चक्की फेला पारेको थियो । पोख्रेललाई सोधपुछ गर्दा पोखराको नयाँबजारमा रहेको विभूति फार्मेसीबाट खरिद गरेको भन्ने बयान दिएका थिए ।

उनको बयानका आधारमा फार्मेसीमा खानतलासी गरिएको र ९० चक्की सोही लागुऔषध बरामद भएपछि सञ्चालक अधिकारीलाई पनि पक्राउ गरिएको प्रहरीले जनाएको छ । दुवैजनालाई लागुऔषध मुद्दामा अधिकारीलाई ९ दिन र पोख्रेललाई १० दिनको म्याद थप गरी अनुसन्धान प्रकृया अगाडि बढाइएको छ ।