पोखरा ।

मुस्ताङको थासाङ गाउँपालिका २ कोबाङ गाउँको शिरबाट खसेको हिमपहिरोका कारण थुनिएको बोक्सीखोला बग्न थालेको छ ।

शुक्रबार दिउँसो धबलागिरी आइसफल क्षेत्रबाट खसेको हिमपहिरोका कारण खोला थुनिएको थियो । हिमपहिरोका कारण खोला थुनिएको खबरपछि मुस्ताङका प्रमुख जिल्ला अधिकारी जनकराज पन्त सहितको सुरक्षाकर्मीको टोली त्यसतर्फ गएको थियो ।

हिमपहिरोका कारण थुनिएको बोक्सीखोला अहिले विस्तारै बग्न थालेको प्रमुख जिल्ला अधिकारी पन्तले जानकारी दिए ।

‘‘कोबाङ गाउँको माथि शिरमा रहेको धबलागिरी आइसफल नजिकबाट खसेको हिमपहिरोका कारण थुनिएको बोक्सी खोला विस्तारै बग्न थालेको छ । खोला बग्न थालेका कारण कुनै ठूलो जोखिम देखिएको छैन,’’ उनले भने ।

जोखिम नभए पनि बोक्सीखोलाका तटीय वस्तीमा सर्तकता अपनाउन प्रशासनले अनुरोध गरेको उनले बताए ।