पोखरा । बिहीबार दिउँसोबाट हराइरहेका १३ वर्षे प्रस्ताव केसी फेवातालमा शुक्रबार मृतावस्थामा भेटिएका छन् ।

पर्वत फलेवास नगरपालिका वडा नं. २ थापाठाना घर भई हाल जिल्ला कास्की पोखरा महानगरपालिका वडा नं. ७ अन्नपूर्ण टोल बस्ने सूर्य बहादुर क्षेत्रीको छोरा प्रस्ताव बिहीबार डेराबाट कोही कसैलाई नसोधी निस्केका थिए । उनका साथीहरुसँग समेत सोधपुछ गर्दा निजको साथीले  २ बजेतिर ड्यामसाईड स्थित फेवातालमा हाम फालेको बताएका थिए ।

वडा प्रहरी कार्यालय बैदाम कास्कीबाट प्रहरी टोली, गण्डकी प्रदेश प्रहरी गण पोखराबाट र शसस्त्र प्रहरी बल नं. २४ हेडक्वाटर मालेपाटनबाट समेत संयुक्त रेस्क्यु टोलीले खोजतलास गर्दा साढे ४ बजेतिर उनी फेवातालमा भेटिएका थिए ।

पश्चिम क्षेत्रीय अस्पताल पोखराले उनलाई मृत घोषणा गरेको हो ।